ठूलो आवाजमा कुखुराको भाले बासेपछि छिमेकीले हाले मुद्दा

• कार्तिक ७, २०८१ | ३३३ पटक पढिएको | सीमा संदेश

छिमेकीहरुबीच झैझगडा हुन र अदालतको चक्कर काट्नका लागि कुनै ठूलो निहुँ नचाहिने रहेछ । फ्रान्सको बोर्गोइनमा एकजना व्यक्ति आफूले पालेको कुखुराको भाले चर्को स्वरमा बासेको अभियोगमा कानूनी कठघरामा उभिनु परेको छ ।

स्थानीय फ्रान्क नाम व्यक्तिले घरमा पालेको पाँच वर्षको कुखुरा रिक्को चर्को स्वरमा कुखुरी काँ…. गर्दै बासेका कारण डिस्टर्ब भएको, राम्रोसँग निद्रा नपर्ने, कुनै काममा ध्यान केन्द्रित गर्न अप्ठेरो हुने तथा सुन्दा सुन्दा दिक्क लाग्ने जस्ता समस्या भएको भन्दै उनका छिमेकीले अदालतमा मुद्दा हाले । अन्ततः अदालतले आउँदो जनवरीका लागि सुनुवाइ तोकेको छ र त्यसबेला फ्रान्क  दम्पती अदालतमा उपस्थित भएर बयान दिनुपर्नेछ ।

नाम नखुलाएका ती छिमेकीले त्यो कुरा दिनरात जतिबेला पनि बास्ने गरेको र उसको आवाज सहनै नसकिने खालको भएको बताएका छन् ।

तर, रिक्कोका मालिक फ्रान्कले पनि छिमेकीको त्यस्तो आरोप अस्विकार गर्दै कुखुराको खोर ठण्डी याममा बिहान ८ बजे र गर्मी याममा ९ बजेमात्रै खोल्ने गरिएको र बेलुकी ८ बजे खोरभित्र राख्ने गरिएको भन्दै रातको समयमा कुखुरा बासेर दिक्क पारेको भन्ने दाबीको खण्डन गरेका छन् ।

साथै आफ्नो कुखुरा बिहान करिब १५ पटक र दिउँसो केही पटक मात्रै बास्ने गरेका बताएका छन् । उनका अनुसार कुखुराको खोरमा अटोमेटिक ढोका छ, जुन माथि उल्लेखित समयमा आफैं खुल्ने र बन्द हुने गर्दछ ।

स्वतन्त्र जिवनयापनका लागि २५ वर्षअघि बोर्गोइनमा बसाइँ सरेको फ्रान्क दम्पती अहिले कुखुराको निहुँमा छिमेकीले कानुनी कारबाही अघि बढाएपछि चिन्तित बनेको छ । उनीहरुले यो मुद्दालाई सुरुमा नगर परिषदको मध्यस्थताबाट मिलाउने कोसिस पनि गरे । तर, उनका छिमेकी मिल्न तयार भएनन् र अदालतसम्म पुगेका छन् ।

आफूले उजुुरीकर्ता बाहेक अरु सबै छिमेकीसँग कुराकानी गरेको र उनीहरु कसैलाई पनि आफ्नो कुखुराको आवाजले कुनै असर नगरेको फ्रान्क बताउँछन् ।