एउटै स्कुलबाट ११ जनाको ४ जीपीए, चित्त नबुझे असार २३ सम्म पुनर्योग गरिसक्नुपर्ने

• असार १४, २०८२ | ४१४ पटक पढिएको | सीमा संदेश

पोखराको मदरल्याण्ड माध्यमिक विद्यालयले यस वर्षको माध्यमिक शिक्षा परीक्षा (एसइई)मा उत्कृष्ट नतिजा निकालेको छ । मदरल्याण्डका ११ जना विद्यार्थीले ४ जीपीए ल्याउन सफल भएका हुन् ।

अभिनव पराजुली, आमन गुरुङ, आरध्ये पौडेल, दिव्या पराजुली, अर्पण पौडेल, विशेष बन्जारा, रीतिका यादव, ओशन त्रिपाठी, साक्षी भण्डारी, सभ्य मल्ल र शास्वत रेग्मीले सर्वोत्कृष्ट नतिजा पाएका हुन् । यीमध्ये ८ जनाले कक्षा ८ मा पनि ४ जीपीए ल्याएका थिए । 

गत वर्ष १० जना विद्यार्थीले ४ जीपीए ल्याएका थिए । यहाँका कुल १६६ जना परीक्षार्थी सहभागी रहेकोमा १ सय ३६ जनाले ३.६ देखि ४.० जीपीएसम्म प्राप्त गरेका छन् । 

३.२ देखि ३.६ जीपीएसम्म २८ जना छन् भने एक जना विद्यार्थीले ३.०५ जीपीए ल्याएका प्राचार्य डा नारायण बरालले बताए । उनका अनुसार यसपटक ३.९६ जिपिए ल्याउने मात्रै १८ जना विद्यार्थी छन् ।

राष्ट्रिय परीक्षा बोर्डले माध्यमिक शिक्षा परीक्षा (एसईई) २०८१ को नतिजामा चित्त नबुझे २३ असार २०८२ भित्र पुनर्योगका लागि आवेदन दिन सकिने बताएको छ ।

प्रकाशित नतिजामा चित्त नबुझेमा पुनर्योग गर्न र उत्तरपुस्तिका पुनः परीक्षण समेत गराउन सक्ने व्यवस्था रहेको बोर्डले जनाएको छ ।

‘पुनर्योगका लागि परीक्षार्थीलाई अनलाइनमार्फत आवदेन गर्न सकिने व्यवस्था गरिएको छ, जसअनुसार परीक्षार्थीले आफूले पुनर्योग गर्न चाहेका विषयका लागि यस कार्यालयको वेबसाइटमा गई पुनर्योग फाराम भरी आवेदन गर्न सक्ने छन्,’ बोर्डले भनेको छ ।

‘पुनर्योगका लागि २३ असारको बेलुका ५ बजेसम्मको समय बोर्डले तोकेको छ । ‘सोसम्बन्धी सूचना नतिजा प्रकाशन भएपछि राष्ट्रिय परीक्षा बोर्ड पनिका कक्षा १० र राष्ट्रिय परीक्षा बोर्ड केन्द्रीय कार्यालयको बेवसाइटबाट हेर्न सकिनेछ,’ बोर्डले भनेको छ ।

त्यस्तै, नतिजा प्रकाशनका क्रममा प्राविधिक कारणबाट कहिँकतै त्रुटि देखिएमा राष्ट्रिय परीक्षा बोर्ड परीक्षा नियन्त्रण कार्यालय कक्षा १० को मूल अभिलेखबाट सच्याइने व्यवस्था गरेको बोर्डले जनाएको छ ।