२६ लाख रुपैयाँभन्दा बढीको सामान बरामद

• भदौ २, २०८३ | ४१ पटक पढिएको | सीमा संदेश

नेपाल–भारत सीमा जोडिएका जिल्लाका विभिन्न ठाउँमा सुरक्षा गस्तीमा खटिएको सशस्त्र प्रहरी बलको टोलीले २६ लाख रुपैयाँभन्दा बढीका अवैध सामान बरामद गरेको छ । 

गस्तीमा रहेका सशस्त्र प्रहरीको छुट्टाछुट्टै टोलीले सोमबार जिल्लाको विभिन्न सीमावर्ती ठाउँबाट २६ लाख २९ हजार ९९३ रुपैयाँबराबरका भन्सार छली गरी ल्याइएको अ‍वैध सामान बरामद गरिएको सशस्त्र प्रहरी बल नेपाल नं. ७ गण हेडक्वार्टर सिराहाका प्रमुख सशस्त्र प्रहरी उपरीक्षक सुमनजंग थापाले जानकारी दिए । उनका अनुसार बरामद गरिएका लत्ताकपडा, कस्मेटिक र किराना सामानहरू, मदिरा, पेय पदार्थ, हार्डवेयरका सामान, बिउबिजन तथा मोटरसाइकल आवश्यक प्रक्रिया पूरा गरी माडर भन्सार कार्यालयमा दाखिला गरिएको छ । 

दुई महिनामा ४७ लाखभन्दा बढीका सामान दाखिला 
पछिल्लो समय सशस्त्र प्रहरी बलले सीमा नाकाबाट हुने अवैध निकासी र चोरी पैठारीविरुद्ध कडा निगरानी र गस्ती गरिरहेको गणले जनाएको छ । सीमामा कडाइसँगै गस्ती बढाइएपछि धमाधम भन्सार छली गरिएका अवैध सामान बरामद हुन थालेको जनाइएको छ। 
गणका अनुसार जिल्लाका विभिन्न सीमावर्ती क्षेत्रबाट सशस्त्र प्रहरीको गस्ती टोलीले गस्तीको क्रममा ४७ लाख रुपैयाँभन्दा बढीको अवैध सामान, मोटरसाइकल बरामद गरी भन्सार दाखिला गरेको छ ।

सशस्त्र प्रहरीले गत २३ साउनमा मोटरसाइकल, लत्ताकपडा, कस्मेटिक सामान, किराना समान तथा विभिन्न ब्रान्डका मदिरा गरी आठ लाख ९७ हजार ९७९ रुपैयाँबराबरको सामान बरामद गरिएको जनाएको छ । त्यस्तै, १ साउनमा १५ लाख ४८ हजार ८७० रुपैयाँ, गत ३ असारमा १४ लाख तीन हजार ३२६ रुपैयाँबराबरको अवैध सामान बरामद गरी भन्सारमा दाखिला गरिएको जनाइएको छ । 

त्यस्तै, १८ असारमा सशस्त्र प्रहरीको गस्ती टोलीले सिराहा नगरपालिका १६ खिरौनाबाट भन्सार छली गरी अवैध रूपमा नेपालतर्फ ल्याउँदै गरेको र नेपालबाट अवैध रूपमा भारततर्फ लैजाँदै गरेको अवस्थामा किराना सामान, कपडा, मोटरसाइकल तथा मदिरा गरी नौ लाख २६ हजार ८५० रुपैयाँबराबरको सामानहरू बरामद गरी भन्सार बुझाइएको गणले जनाएको छ ।