स्रोत नखुलेको ११ लाख नगद सहित एकजना पक्राउ

• चैत १३, २०७८ | ७५५ पटक पढिएको | सीमा संदेश

सिरहा। सशस्त्र प्रहरीले सिहाबाट स्रोत नखुलेको ११ लाख २ हजार नौसय पचास रुपैयाँ सहित एक जनालाई नियन्त्रणमा लिएको छ । सशस्त्र प्रहरी वल नं. २ छिन्नमस्ता वाहिनी बर्दिवास महोत्तरी र सशस्त्र प्रहरी वल नं. ७ गण हेड क्वाटर सिरहाबाट खटिएको टोलिले लहान १ मटिअर्वाबाट भगवानपुर गापा ४ का ४४ वर्षिय दिलिप कुमार साहलाई नियन्त्रणमा लिएको हो ।

विशेष सुचनाको आधारमा सीमाक्षेत्र भगवानपुरबाट पछ्याउँदै आएका प्रहरीले लहानबाट ८ सय ३ थान हजाका नोट, ४ सय वटा पाँचसयको नोट ९ सय ९९ वटा सयको र एक थान ५० को नोट सहित नियन्त्रणमा लिएको जनाएको छ ।

नियन्त्रण लिएका साहलाई रकम सहित आवश्यक अनुसान्धान एवम् कार्वाहीको लागि जिल्ला भन्सार कार्यालय माडरलाई बुझाएको छ ।

प्रायः सीमाक्षेत्रका भारतिय बजारमा कारोवार भएको नेपाली रुपैयाँ सिरहाको लहान, गोलबजार, सिरहा सदरमुकामका बैंकमा जम्मा गर्न लिएर आउने जानकारहरु बताउँछन् । भारतीय व्यसायीहरुले नेपालमा रहेका आफन्त वा विश्वासिला व्यसायीहरुको नाममा खाता खोलेर रकम जम्मा गर्ने र एटिएमको माध्यमबट भारतमै रकम निकाल्ने गरेको बताइन्छ ।