सिरहाको भगवानपुर गाउँपालिकामा नवरात्र पर्यटन महोत्सव - २०७८ मनाइने

• चैत १८, २०७८ | २,८७३ पटक पढिएको | सीमा संदेश

सिरहा । ऎतिहासिक र धार्मिक रुपले प्रसिद्ध सिरहाको भगवानपुर गाउँपालिका वाडा नम्बर - १ स्थित रहेको श्री बालासुन्दरी भगवती मन्दीरमा नवरात्र पर्यटन महोत्सव - २०७८ मनाइने भएको छ ।

धार्मिक क्षेत्रको विकास गर्नुका साथै पर्यटकलाई भित्राउने उदेश्य सहित मोहोत्सव आयोजना गर्न लागिएको गाउँपालिका अध्यक्ष बेचन प्रसाद यादवले बताउनु भयो । २०७८ चैत १९ गते देखि २९ गते सम्म ११ दिनको लागि चल्ने महोत्सवमा धार्मिक , सांस्कृतिक , स्थानीय रितिरिवाज र रहनसहनलाई झल्काउने खालका (पहिचान संग सम्बन्धित ) विभिन्न जागरणका कार्यक्रमहरु गरिने उहाँले बताए ।

महोत्सवको उदघाटनका दिन विशाल कलशयात्र हुने बालासुन्दरी मोहोत्सव मुल समितिका अध्यक्ष रामविलास सदायले बताएका छन् । महोत्सव अबधिमा रासलिला , भजनकिर्तन , होमकुण्ड , शान्ती जागरणका लागि जनचेतना कार्यक्रम , धार्मिक अनुष्ठान , २४ घण्टे अष्ट्याम , शोभायात्रा लगायतका कार्यक्रम पनि गरिने अध्यक्ष सदायले बताए ।

महोत्सवमा कृषि मेला , रमाईलो मेला, झाँकी प्रर्दशन , बैलगाडा दौड प्रतियोगिता खेलकुद लगायत निबन्ध प्रतियोगिता समेत संचालन गरिने भगवानपुर गाउँपालिका वडा नम्बर - १ का वडा अध्यक्ष बद्री नारायण यादवको भनाई छ । महोत्सवमा मनोरञ्जनका लागि नृत्यका कार्यक्रमहरु समेत संचालन गरिने भएको छ ।

धार्मिकरुपले भगवानपुर गाउँपालिकालाई चिनाउने माँ भगवती बालासुन्दरी मन्दिरमा गत बर्स देखि निरन्तर रुपमा मोहत्सव संचालन भैरहेको छ । महोत्सव संचालन गर्न यस आर्थिक बर्षमा गाउँपालिकाले १५ लाख रुपैयाँ बजेट बिनियोजन गरेको छ । महोत्सव संचालन गर्नकालागि स्थानीहरुले पनि सहयोग गरेको बहुजन शक्ति पार्टी नेता तथा समाजसेवी रामेन्द्र मण्डलले बताए ।