सिरहामा जन्ती बोकेको बस दुर्घटना, ३१ जना घाइते

• वैशाख ८, २०७९ | ७९९ पटक पढिएको | सीमा संदेश

सिरहा । सिरहाको गोलबजारमा जन्ती बोकेको बस र टिपर आपसमा ठोकिदा ३१ जना घाईते भएका छन् ।

पूर्व-पश्चिम राजमार्गमा पर्ने गोलबजार नगरपालिका ४ चोहर्वामा जन्ती बोकेको ना. ६ ख. ८२०१ नम्वरको बस र को. १ ख. ५४३४ नम्वको टिफर आपसमा ठोकिएको हो । स्थानीयका अनुसार विपरित दिशाबाट आईरहेको टिपर बसमा ठोकिएपछि दुर्घटना भएको छ ।

दुर्घटनामा बस र टिपरका चालक र बसमा सबार जन्ती गरी ३१ जना घाइते भएको प्रहरीले जनाएको छ । घाइतेहरुमा महोत्तरीको भङ्गहा नगरपालिका–३ टिकुलियाका ४४ वर्षीय सुनिल सिंह, ६५ वर्षीय महेन्द्र चौधरी, गौशाला नगरपालिकाका ४५ वर्षीय लालो चौधरी, धनुषाका १२ वर्षीय अर्जुन चौधरी, दुवै गाडीका चालकलगायत ३१ घाइते भएको जिल्ला प्रहरी कार्यालय सिरहाले जनाएको छ । घाइतेहरुलाई स्थानीय र प्रहरीले स्थानीय लाईफ लङ्ग हस्पिटल र गोलबजार हेल्थ केयर सेन्टरमा भर्ना गराएका छन् ।

दुर्घटनामा घाईते सबैको अवस्था सामान्य रहेको इलाका प्रहरी कार्यालय गोलबजारका इन्सपेक्टर राजु केसीले जानकारी दिए । सप्तरीबाट महोत्तरीको भङ्गहा फर्किरहेको जन्तीको बस दुर्घटनामा परेको उनको भनाई छ ।