छोरी बलात्कार र छोरा हत्या आरोपमा बाबु पक्राउ

• माघ ५, २०८० | ४७७ पटक पढिएको | सीमा संदेश

पञ्चपुरी नगरपालिका– ६ कुवापानीका १८ वर्षीय छोरा भरत बुढाको हत्या आरोपमा उनकै बाबु ४५ वर्षीय नयाँराम बुढा पक्राउ परेका छन् । बुढालाई कैलाली टीकापुर नगरपालिका– १ लम्कीपुरबाट प्रहरीले पक्राउ गरेको हो । बुढा बिहीबार बिहान १० बजे लम्कीपुरबाट पक्राउ परेको जिल्ला प्रहरी कार्यालय सुर्खेतका निमित्त प्रवक्ता प्रहरी निरीक्षक कृष्णबहादुर खड्काले बताए ।

कर्णाली प्रदेश प्रहरी कार्यालयबाट प्रहरी वरिष्ठ नायब निरीक्षक नारायण शर्मा, प्रहरी निरीक्षक बुद्धिप्रसाद सुवेदी, इलाका प्रहरी कार्यालय बाबियाचौरका प्रहरी प्रमुखको टोली टीकापुर गएको थियो । मोबाइल लोकेसनका आधारमा टीकापुर पुगेको प्रहरी टोलीले उनलाई पक्राउ गरेको हो ।

नयाँराममाथि छोरी बलात्कार र छोराको हत्या गरेको आरोप लागेको छ । बुढाले २ माघमा छोरा भरतको बन्चरो प्रहार गरी हत्या गरेको आरोप छ । बहिनीलाई बलात्कार गरेको आरोपमा दाजु भरतले बुबा नयाँरामविरुद्ध प्रहरीमा उजुरी दिएका थिए । सोही कारण उनको हत्या भएको हुन सक्ने अनुमान प्रहरीले गरेको छ ।