डिजेल र पेट्रोलको मूल्य बढ्यो निगमले पेट्रोलमा प्रतिलिटर १.९ रुपैयाँ र डिजेल/मट्टीतेलमा प्रतिलिटर २.२२ रुपैयाँका दरले मूल्य बढायो

• पुस १७, २०८१ | ४६७ पटक पढिएको | सीमा संदेश

नेपाल आयल निगमले पेट्रोलियम पदार्थको मूल्य बढाएको छ । निगमले मंगलबार रातिदेखि लागू हुने गरी पेट्रोलमा प्रतिलिटर १ रुपैयाँ ९ पैसा,  डिजेल तथा मट्टीतेलमा प्रतिलिटर २ रुपैयाँ २२ पैसा र आन्तरिकतर्फको हवाई इन्धनको प्रतिलिटर २ रुपैयाँका दरले भाउ बढाएको हो । 

अन्तर्राष्ट्रिय हवाई इन्धनको मूल्य भने घटाइएको छ । निगमले प्रतिकिलोलिटर १५ अमेरिकी डलरका दरले घटाएको हो । खाना पकाउने एलपी ग्यासको मूल्य भने यथावत् राखिएको छ । नयाँ मूल्यसूचीअनुसार पहिलो वर्गमा पेट्रोलको बजार मूल्य प्रतिलिटर १ सय ६० रुपैयाँ ५० पैसा र  डिजेल/मट्टीतेलको १ सय ५० रुपैयाँ ५० पैसा कायम भएको छ ।

यो वर्गमा चारआली, विराटनगर, जनकुपर, अमलेखगन्ज, भलबारी, नेपालगन्ज, धनगढी र वीरगन्ज पर्छन् । त्यस्तै, दोस्रो वर्गमा पेट्रोलको बजार मूल्य प्रतिलिटर १ सय ६२ रुपैयाँ र डिजेल/मट्टीतेलको १ सय ५२ रुपैयाँ निर्धारण गरिएको छ । यो वर्गमा सुर्खेत र दाङ पर्छन् । तेस्रो वर्गमा भने पेट्रोलको बजार मूल्य प्रतिलिटर १ सय ६३ रुपैयाँ र डिजेल/मट्टीतेलको १ सय ५३ रुपैयाँ कायम भएको छ ।

यो वर्गमा काठमाडौं, पोखरा र दिपायल पर्छन् । नयाँ मूल्यअनुसार हवाई इन्धनको आन्तरिकतर्फ प्रतिलिटर १ सय २६ रुपैयाँ प्रतिलिटर र अन्तर्राष्ट्रियतर्फ प्रतिकिलोलिटर काठमाडौंमा ९ सय ६० डलर, पोखरामा ७ सय ९३ डलर र भैरहवामा ७ सय ७८ डलर कायम भएको छ ।