बिहेमा गएका दुई समूहबिच झडप हुँदा एकजनाको मृत्यु

• फागुन ९, २०८१ | ५७३ पटक पढिएको | सीमा संदेश

बाजुराको बुढीगंगा नगरपालिका– ८ मोटाबाडामा बिहेको निम्तोमा गएका दुई समूहबिचको झडपमा घाइते भएका एकजनाको उपचारका क्रममा मृत्यु भएको छ।

मृत्यु हुनेमा बुढीगंगा– ८ डुग्रीतोलाका अन्दाजी २९ वर्षीय रणबहादुर थापा रहेका प्रहरीले जनाएको छ। जिल्ला प्रहरी कार्यालय बाजुराका सूचना अधिकारी जनक बोहराका अनुसार गएराति बिहेको निम्तो खान गएका दुई समूहबिच दोहोरो झडप भएको थियो। झडपमा परी थापा घाइते भएका थिए।

अछामको बयालपाटा अस्पतालमा उपचारका क्रममा उनको मृत्यु भएको बोहराले जानकारी दिए। उनका अनुसार आरोपित तीनजनालाई पक्राउ गरी जिल्ला प्रहरी कार्यालयमा ल्याई घटनाबारे सोधपुछ तथा अनुसन्धान भइरहेको छ।

पक्राउ पर्नेमा बुढीगंगा– ७ वाइलका दीर्घ विष्ट, खेम विष्ट र लोकेन्द्र खड्का रहेका जिल्ला प्रहरी कार्यालय बाजुराले जनाएको छ। मृतक थापाको शव बयालपाटा अस्पतालबाट पोस्टमार्टमका लागि जिल्ला अस्पताल ल्याउने तयारी भइरहेको प्रहरीले जनाएको छ।