जवर्जस्ती गर्भपतनको औषधि खुवाउँदा सकस

• जेठ ३०, २०८२ | ५२८ पटक पढिएको | सीमा संदेश

तीन वर्षको प्रेम सम्बन्धपछि विवाह गरेकी सप्तरीको हनुमानननगर कंकालिनी नगरपालिका–२ सकरदहीकी २० वर्षीया सनिशा खंग अस्पतालको शैय्यामा पीडाले छटपटाइरहेकी थिइन् । चार महिनाकी गर्भवती रहेकी सनिशालाई एकाबिहानै गजेन्द्रनारायण सिंह अस्पताल राजविराज ल्याइएको थियो । उनकी सासू ४४ वर्षीया झुलफुलदेवी खंग र अर्का एक जनाले जबरजस्ती सनिशालाई गर्भवतनको औषधि खुवाएपछि पेटको दुखाईले अचेत अवस्थामा पुगेकी उनलाई छिमेकीको सहयोगमा अस्पतालसम्म ल्याइयो । तर ढिलो भइसकेकोले सनिशाको गर्भमा रहेको बच्चा जोगाउन नसकिएको उपचारमा संलग्न चिकित्सक डा. दिलिपकुमार साहले बताए ।

उनका पती २२ वर्षीय शिवजी खंग अढाई महिनादेखि सनिशाको सम्पर्कमा छैनन् । अस्पतालको २१ नम्बर शय्यामा छटपटाइरहेकी सनिशाले भनिन्, ‘प्रेमीले धोका दिँदा घर न घाटकी भइसकेकी छु, बच्चाको लागि बाँच्न खोजेको थिए तर त्यो पनि रहन दिएन ।’ उनले मंगलबार राति करिब ११ बजेतिर सासू झुलफुलदेवी र छिमेकी सासू पर्नेले जबरजस्ती गर्भपतनको औषधि खुवाएकी बताइन् ।

‘दुवै जनाले औषधि खुवाएपछि मोबाइल पनि खोजिहाल्दा कसैसँग समयमा सम्पर्क पनि गर्न सकिनँ,’ उनले थपिन्, ‘जसोतसो गरेर तीन घण्टापछि घरबाट निस्किएर छिमेकीसँग सहयोग मागे, असाध्यै पेट दुखिरहँदा छिमेकीकै सहयोगमा अस्पतालसम्म आएँ, तर बच्चा जोगाउन नसक्दा मर्नु न बाच्नु भइरहेको छ ।’

एक वर्षअघि उनका प्रेमी शिवजीले नै जोडबल गरेपछि दुवै जनाले कंकालिनी भगवती मन्दिरमा प्रेम विवाह गरेका थिए । तत्काल अलग–अलग बसेर पढाई पूरा भएपछि सँगै बस्ने उनीहरुबीच सहमति थियो । तर, चैतको पहिलो साता शिवजीले सनिशालाई आफ्नै घरमा राख्ने भन्दै घर लगे पनि शिवजीका बुवा परमेश्वर खंग र आमा झुलफुलदेवीले उनलाई बुहारी स्वीकार गर्न तयार भएनन् ।

१२ दिन उनकी दिदीको ससुराली (दौलतपुर) मा बसेकी बताउँदै सनिशाले त्यहाँ पनि दिल्ली लगेर गर्भपतन गराउने योजना बनाएपछि त्यहाँबाट भागेर घर फर्किएको बताइन् । तीन महिनाभन्दा बढी समयदेखि मागेरै गुजारा चलाउँदै आएकी सनिशालाई जबरजस्ती औषधि खुवाएर गर्भवतन गराउँदा उनी थप विच्चलीमा परेकी छन् । सनिशाले कक्षा १२ सम्म पढेर छाडेकी छन् । एसपी ढकेन्द्र खतिवडाले सनिशाका सासूससुरालाई नियन्त्रणमा लिएर अनुसन्धान भइरहेको जानकारी दिए ।