कपिल शर्माको क्याफेमा गोलाबारी, कमेडियनलाई चेतावनी

• असार २७, २०८२ | ५०३ पटक पढिएको | सीमा संदेश

क्यानडाको ब्रिटिस कोलम्बियास्थित सर्रेमा रहेको हास्य कलाकार कपिल शर्माको क्याफेमा बुधबार राति आक्रमण भएको थियो। कपिल शर्माले गत जुलाई ७ मा मात्र क्याप्स क्याफे नामक यो क्याफेको उद्घाटन गरेका थिए। 

मिडिया रिपोर्टका अनुसार आक्रमणकारीहरूले क्याफेमा ९ राउन्ड गोली चलाएका थिए। एनडीटीभीको रिपोर्टले खालिस्तानी आतंककारी हरजीत सिंह लाडीले आक्रमणको जिम्मेवारी लिएको दाबी गरेको छ। हरजीत सिंह राष्ट्रिय अनुसन्धान एजेन्सी (एनआईए) को सूचीमा रहेका मोस्ट वान्टेड आतंककारीहरू मध्ये एक हुन् र बब्बर खालसा इन्टरनेशनल (बीकेआई) सँग सम्बन्धित छन्।

आक्रमणकारीले गोलाबारी गरेको भिडियो पनि बनाएका छन्, जुन सामाजिक सञ्जालमा भाइरल भइरहेको छ। यसमा क्याफे बाहिर कारमा बसेको एक व्यक्ति कार भित्रबाट निरन्तर गोलाबारी गरिरहेको देखिन्छ। यद्यपि, घटनामा अहिलेसम्म कोही घाइते भएको खबर छैन।

गोलीबारीपछि प्रहरी र फोरेन्सिक टोली घटनास्थलमा पुगेर अनुसन्धान गरिरहेको बताइएको छ। कमेडी शोको क्रममा निहंग सिखहरू विरुद्ध गरिएको टिप्पणीलाई लिएर कपिल शर्माको क्याफेमा हरजीत सिंह लाडीले गोलाबारी गरेको बताइएको छ।

सामाजिक सञ्जालमा, हरजीत सिंह लाडी र तुफान सिंह नामका अर्का व्यक्तिले कपिल शर्मालाई भिडियो मार्फत सार्वजनिक रूपमा माफी माग्न चेतावनी दिएका छन् । यदि उनले माफी नमागेमा मामिला बिग्रन सक्ने बताएका छन्।

दुवैले कपिल शर्माका म्यानेजरलाई धेरै पटक सम्पर्क गर्ने प्रयास गरेको तर बेवास्ता गरिएको दाबी पनि गरे। अन्ततः हास्य कलाकारको ध्यान खिच्न उनीहरूले क्याफे बाहिर गोली चलाउनुपरेको बताएका छन्।

यद्यपि, कपिल शर्माले निहंग सिखहरूमा के टिप्पणी गरे भन्ने कुरा स्पष्ट छैन। यस वर्षको सुरुमा, निहंग नेता बाबा बलबीर सिंहले पनि कपिल शर्माको सामग्रीमा आपत्ति जनाएका थिए।