बिहार विधानसभा निर्वाचन दुई चरणमा हुने

• असोज २१, २०८२ | ५०५ पटक पढिएको | सीमा संदेश

बिहार विधानसभा निर्वाचनको मिति भारतको निर्वाचन आयोगले घोषणा गरेको छ ।

यस पटकको निर्वाचन दुई चरणमा सम्पन्न हुने जनाइएको छ । विगत दुई दशकयताको सबैभन्दा छोटो निर्वाचन तालिका रहेको बताइन्छ । निर्वाचन आयोगका मुख्य निर्वाचन आयुक्त ज्ञानेश कुमारले जनाए अनुसार पहिलो चरणको मतदान २०२५ नोभेम्बर ६ मा र दोस्रो तथा अन्तिम चरणको मतदान २०२५ नोभेम्बर ११ मा हुने छ ।

पहिलो चरणमा १२१ निर्वाचन क्षेत्रमा मतदान हुने छ भने दोस्रो चरणमा १२२ निर्वाचन क्षेत्रहरूमा मतदान हुने उनले बताए । कुल २४३ सिटको विधानसभाका लागि परेका मतहरूको मतगणना २०२५ नोभेम्बर १४ मा गरिने उनले बताए । यस निर्वाचनमा वर्तमान सत्तारुढ राष्ट्रिय लोकतान्त्रिक गठबन्धन (एनडिए) र प्रमुख विपक्षी ‘महागठबन्धन’ बीच मुख्य प्रतिस्पर्धा हुने अपेक्षा गरिएको छ ।

शान्तिपूर्ण, निष्पक्ष र पारदर्शी ढंगले चुनाव सम्पन्न गर्नका लागि सम्पूर्ण तयारी पूरा भएको निर्वाचन आयोगले जनाएको छ ।