महन्थ ठाकुरः ‘जीवन के साथ भी, जीवन के बाद भी’

• पुस २३, २०८२ | ९१ पटक पढिएको | सीमा संदेश

जनता समाजवादी पार्टी (जसपा) नेपाल र लोकतान्त्रिक समाजवादी पार्टी (लोसपा) नेपालबीचको एकीकरण अड् किएको छ । जसपा नेपालमा लोसपा नेपालका अध्यक्ष महन्थ ठाकुरको पदको विषयमा सहमति हुन सकेको छैन । सहमति पत्र तयार भइसकेपछि ठाकुरले निर्वाचन आयोगमा आफ्नो हस्ताक्षर हुनुपर्ने अडान लिएपछि हस्ताक्षर रोकिएको छ ।

त्यसैगरी राष्ट्रिय सभामा ठाकुरकी छोरी डा.मीनाक्षी ठाकुर झाको मधेशी क्लस्टरमा नाम पहिलो प्राथमिकतामा राख्ने विषयमा सहमति रोकिएको छ । जसपाका एकजना पदाधिकारीका अनुसार ठाकुर र उनकी छोरीको विषयमा पनि यादव सहमत भएका छन् । कार्यकारी अधिकारमा रहने अध्यक्षको नै हस्ताक्षर निर्वाचन आयोगमा हुनुपर्नेमा जसपाका केही पदाधिकारीहरु समेत यादवलाई सुझाएका छन् ।

सोमबार दुबै दलका अध्यक्ष ठाकुर र यादव समेतको सहभागिता रहेको बैठकमा पार्टीको नाम जनता समाजवादी पार्टी(जसपा) नेपाल र चुनाव चिह्न छाता छाप राख्ने विषयमा सहमति भएको थियो । ३७ सदस्यीय कार्यकारिणी समितिमा पनि सहमति जुटेको स्रोतले जनाएका छन् । तर ठाकुरलाई दिइने पद र उनको पुत्रीको विषयमा अबेर रातिसम्म सहमति नहुँदा मंगलबार पनि सहमति हुन सकेन ।

उच्च स्रोतले जनाए अनुसार जसपा नेपालका नेताहरुले ठाकुरलाई ‘सम्मानित नेता, संरक्षक अथवा राष्ट्रिय परिषद् अध्यक्ष’ मध्ये कुनै एउटा पद दिन अध्यक्ष यादवले उदारता देखाएका छैनन् । तर उनी राष्ट्रिय परिषद्को अध्यक्षमा सकारात्मक देखिएका छन् । राष्ट्रिय सभाको उम्मेदवारी दिन ठाकुर जनकपुरधाम र जसपा नेपालको कार्यक्रममा सहभागी हुन यादव भैरहवा गएकाले मंगलबार संवाद हुन सकेन । राष्ट्रिय सभामा उम्मेदवारी दिन ठाकुरलाई यादवले नै प्रस्ताव गरेकाले त्यसमा विवाद नरहेको स्रोतले जनाएका छन् ।

मधेशको राजनीतिमा ठाकुरलाई नेताहरुले जीवन बीमा(एलआइसी) पनि भनेर कटाक्ष गर्ने गर्छन् । ‘जीवनका साथ भी जीवनका बाद भी’ एलआइसीको नारालाई ठाकुरले आफूमा फिट गरेको नेताहरु बताउँछन् । जीवनको उत्तराद्र्धमा पुगेका ठाकुरले आफूलाई राष्ट्रिय सभामा ६ वर्षका लागि र छोरीलाई प्रतिनिधि सभामा पु¥याउने सुनिश्चितता चाहेका छन् । त्यसका लागि उनले जसपा नेपालसित एकीकरण गर्न लागेको बताइन्छ ।

राष्ट्रिय सभा सदस्यका लागि नेपाली कांग्रेस अथवा एमाले र नेपाल कम्युनिष्ट पार्टी(नेकपा) सित जसपा नेपालले तालमेल नगरे चुनाव जित्न सकिदैन । कांग्रेस र एमालेबीच तालमेल भए जसपाको समर्थन बिना नै चुनाव जित्ने समीकरण बन्ने छ । जसपा र लोसपाको एकीकरण घोषणामा ग्रहण लागेपछि एकजना नेताले भने, ‘हात्ती छि¥यो, पुच्छर अड्कियो मात्र भएको छ ।’ तर एकीकरणको अन्य विषयमा सहमति भइसकेकोले एउटा विषयले मात्र नरोकिने उनले विश्वास व्यक्त गरे ।

मधेशका नागरिकको चाहना र भावनालाई सम्मान गर्दै एकीकरणको प्रक्रिया अगाडि बढाइएको बताउँदै अर्का एकजना नेताले भने, अलग–अलग भएर चुनावमा गए दुवै दलका लागि अकल्पनीय परिणाम आउने छ । गत चुनावमा जसपा नेपालले राष्ट्रिय दलको मान्यता पाएका थिए । लोसपा नेपालले राष्ट्रिय दलको मान्यता पाउन नसक्दा समानुपातिक तर्फको सिट प्रतिनिधि सभामा पाउन सकेन । तर दुबै दल मिलेर चुनावमा गए अप्रत्यासित सफलता हात पाउने ती नेताले बताए ।

एकीकरणका लागि दुबै पार्टीका अध्यक्ष दबाबमा रहेको बताउँदै उनले भने, यादव र ठाकुर बाहेकका नेताहरुमा सबै विषयमा सहमति भइसकेको छ । जसपा नेपालका महासचिवसमेत रहेका मधेश प्रदेशका पूर्वमुख्यमन्त्री मो. लालबाबु राउतले सहमतिमा हस्ताक्षर हुन नसकेपछि एकीकरणको लागि पुनः वार्ता हुने सहमति भएको बताए । ‘एकीकरणको सबै विषयमा सहमति भइसकेको थियो’ उनले भने, तर अन्तिम समयमा सहमति पत्रमा दुबै नेताको हस्ताक्षर हुन सकेन ।

एकताको प्रक्रिया पुनः थालिने उनले बताए । ‘मधेश प्रदेशबाट राष्ट्रिय सभामा ठाकुरलाई जसपाले सघाउने छ’ राउतले भने, तर जसपा नेपालले अन्य तीन वटा क्लस्टरमा उम्मेदवारी दिने छ । यता लोसपा नेपालका मधेश प्रदेश अध्यक्ष रामविनोद चौधरीले लोसपा–जसपाको एकीकरण अन्तिम चरणमा रहेको एकता प्रक्रिया अघि बढिसकेकाले केही दिनमै मूर्तरुप लिने बताए । राष्ट्रिय सभा निर्वाचनका लागि ठाकुरले उम्मेदवारी दिएपछि यादव र ठाकुरसंग पुनः संवाद भएर अन्तिम छिनोफानो गर्ने उनको भनाइ छ ।