मधेशमा रास्वपाको लहर : ३२ मध्ये ३० सिट कब्जा

• फागुन २५, २०८२ | २६२ पटक पढिएको | सीमा संदेश

प्रतिनिधिसभा सदस्यको हालै सम्पन्न निर्वाचनले मधेश प्रदेशको राजनीतिक तस्वीर नै बदलिएको छ । प्रदेशका ३२ निर्वाचन क्षेत्रमध्ये ३० सिट जित्दै राष्ट्रिय स्वतन्त्र पार्टी (रास्वपा) ले अप्रत्याशित सफलता हासिल गरेको छ ।

यस परिणामले परम्परागत रूपमा प्रभाव जमाउँदै आएका ठूला दलहरूलाई गम्भीर झट्का दिएको छ । यस निर्वाचनमा नेपाली कांग्रेसले मात्र एउटा सिट जितेर आफ्नो उपस्थिती जोगाएको छ । नेकपा एमाले तथा मधेशकेन्द्रित दलहरू भने अधिकांश क्षेत्रमा पराजित हुँदै प्रभाव कायम राख्न असफल देखिएका छन् ।

धनुषा क्षेत्र नम्बर–१ मा मतपरिणाम विवादमा परेपछि निर्वाचन आयोगले अन्तिम नतिजा सार्वजनिक गर्न रोक लगाएको छ । मतगणनाको नतिजाअनुसार सप्तरी, सिरहा, महोत्तरी, सर्लाही, रौतहट र पर्सा जिल्लाका चारै निर्वाचन क्षेत्रमा रास्वपाले जीत निकाल्दै क्लिन स्वीप गरेको छ ।

सप्तरी — सप्तरीको १ मा रास्वपाका पुष्पाकुमारी चौधरीले ३८ हजार १९५ मत ल्याई विजयी भएका छन् भने उनका निकटम प्रतिष्पर्धी स्वाभिमान पार्टीका सुमित कुमारले ७ हजार ८४७ मत ल्याएका छन ।

सप्तरी २ मा रास्वपाका रामजी यादव २८ हजार ४०४ मत ल्याएर विजयी भएका छन भने जसपा नेपालका उमेश यादवले १४ हजार २७३ मत ल्याई दोश्रो र जनमत पार्टीका डा. सिके राउतले ९ हजार ८८० मत ल्याई तेश्रो भएका छन् ।

सप्तरी ३ मा रास्वपाका अमरकान्त चौधरीले ३२ हजार ८७५ मत ल्याई विजयी भएका छन् भने जसपा नेपालका अध्यक्ष उपेन्द्र यादवले १५ हजार २३९ मत ल्याई प्रतिष्पर्धी बनेका छन ।

सप्तरी ४ मा रास्वपाका सीतराम साह ३६ हजार ४१२ मत ल्याएर विजयी भएको र कांग्रेसका तेजुलाल चौधरी १३ हजार १०३ मत ल्याई दोश्रो छन् ।

सिरहा — सिरहा क्षेत्र नम्बर–१ मा राष्ट्रिय स्वतन्त्र पार्टी (रास्वपा) का बब्लु यादव गुप्ता ४१ हजार ३२२ मतसहित निर्वाचित भएका छन् भने उनका निकटतम प्रतिस्पर्धी नेपाली कांग्रेसका रामसुन्दर चौधरीले ९ हजार ७८४ मतसहित दोश्रो भएका छन् ।

क्षेत्र नम्बर–२ मा रास्वपाका शिवशंकर यादव ३९ हजार ५६१ मतसहित विजयी हुँदा कांग्रेसका रामसन्द्री यादव १२ हजार ८०० मतसहित दोस्रो स्थानमा रहेका छन् ।

क्षेत्र नम्बर–३ मा रास्वपाका शम्भु कुमार यादव ३२ हजार ९४९ मतसहित निर्वाचित भएका छन् भने हिमालय दलका लीलानाथ श्रेष्ठ १० हजार १२६ मतसहित दोस्रो स्थानमा छन् ।

क्षेत्र नम्बर–४ मा रास्वपाका तपेश्वर यादव ३६ हजार २१० मतसहित विजयी हुँदा नेकपाका उम्मेदवारले ७ हजार ९७९ मत ल्याएर दोस्रो छन् ।

धनुषा — धनुषा क्षेत्र नम्बर–१ को परिणाम अझै विवादित अवस्थामा रहेका कारण परिणाम रोकिएको छ ।

क्षेत्र नम्बर–२ मा रास्वपाका रामविनोद यादव ४१ हजार ६३७ मतसहित निर्वाचित भएका छन् । कांग्रेसका दिनेश प्रसाद यादव परसैला यादव १० हजार १९८ मतसहित दोस्रो प्राप्त गरेका छन् ।

क्षेत्र नम्बर–३ मा रास्वपाका मनिष झा ४३ हजार ९८८ मतसहित विजयी भएका छन् भने कांग्रेसका विमलेन्द्र निधि १६ हजार ६५२ मतसहित प्रतिष्पर्धी बनेका छन् ।

क्षेत्र नम्बर–४ मा रास्वपाका राजकिशोर महतो ४८ हजार २७० मत ल्याएर भारी मतान्तरले विजयी भएका छन् । कांग्रेसका उम्मेदवार महेन्द्र यादव १५ हजार ८०९ ल्याई दोश्रो स्थानमा परेका छन् रघुवीर महासेठ ११ हजार ५२ ९ मतसहित तेश्रो स्थानमा छन् ।

महोत्तरी — महोत्तरी क्षेत्र नम्बर–१ मा रास्वपाका प्रमोद कुमार महतो ३४ हजार ६३६ मतसहित विजयी भएका छन् । नेकपाका गिरिराजमणि पोखरेल १२ हजार ६२४ मतसहित दोस्रो भएका छन् ।

क्षेत्र नम्बर–२ मा रास्वपाका दीपक कुमार साह ३२ हजार ७२२ मतसहित निर्वाचित भएका छन् । साहले मधेशका दिग्गज नेता मानिएका १३ पटक जितेका जसपा नेपालका शरत सिंहलाई मात्र १० हजार १९८ मत ल्याई पराजित भएका छन् ।

क्षेत्र नम्बर ३ मा रास्वपाकै उम्मेदवार उज्जवलकुमार झा ३२ हजार ४१५ मत ल्याई विजयी भएको छ भने यहाँ निकटम प्रतिष्पर्धी नेपाल संघीय समाजवादी पार्टीका अध्यक्ष मोहम्मद रिजवान अन्सारी ५ हजार ९६९ मत ल्याएर बनेका छन् ।

क्षेत्र नम्बर–४ मा रास्वपाकी गौरी कुमारी ३० हजार १३२ मतसहित विजयी हुँदा जसपा नेपालका सुरेन्द्र यादव ८ हजार ७४२ मतसहित दोस्रो स्थानमा छन् ।

सर्लाही — सर्लाही क्षेत्र नम्बर–१ मा रास्वपाका नितिमा भण्डारी कार्की ४६ हजार १८१ मतसहित विजयी भएका छन् भने कांग्रेसका शम्भुलाल श्रेष्ठ ७ हजार ८७१ मतसहित दोस्रो स्थानमा छन् ।

क्षेत्र नम्बर–२ मा रास्वपाका रविन महतो ४२ हजार ५१२ मत ल्याएर निर्वाचित भएका छन् । उनका निकटम प्रतिष्पर्धी नेकपा महेन्द्र राय यादव ८ हजार ५२३ मत मात्र ल्याउन सकेका छन् ।

क्षेत्र नम्बर–३ मा रास्वपाका नरेन्द्र साह कलवार ४६ हजार ८९० मतसहित विजयी भएका छन् भने नेकपाका नारायणकाजी श्रेष्ठ १३ हजार ३३८ मतसहित दोस्रो स्थानमा छन् । कलवार नेकपाकै थिए उनले त्यहाँबाट टिकट नपाएपछि रास्वपाबाट उम्मेदवार बनेका थिए ।

क्षेत्र नम्बर–४ मा रास्वपाका अमरेश कुमार सिंह ३५ हजार ६२८ मतसहित विजयी भएका छन् । कांग्रेसका सभापति गगन थापा २२ हजार ८३१ मतसहित पराजित भएका छन् ।

रौतहट — रौतहट क्षेत्र नम्बर–१ मा रास्वपाका राजेश कुमार चौधरी २८ हजार ९४६ मतसहित विजयी भएका छन् भने एमालेका अजय कुमार गुप्ता १० हजार ६९३ मतसहित दोस्रो स्थानमा छन् ।

क्षेत्र नम्बर–२ नै यस्तो क्षेत्र हो जहाँ कांग्रेसले आफ्नो साख जोगाउन सफल भएको छ । यहाँ कांग्रेसका मोहम्मद फिरदौस आलम २९ हजार ५२८ मत ल्याएर विजयी भएका छन् भने नेकपाका किरण कुमार साह १८ हजार ४४२ मतसहित दोस्रो स्थानमा रहेका छन् ।

क्षेत्र नम्बर–३ रास्वपाका रविन्द्र पटेल २७ हजार ३१८ मत ल्याई विजयी भएका छन् भने जसपा नेपालका गोविन्द चौधरी ११ हजार ९५४ मत ल्याई दोश्रो स्थानमा छ ।

क्षेत्र नम्बर–४ मा रास्वापका गणेश पौडेल ३६ हजार ८७६ मत ल्याई विजयी भएका छन भने कांग्रेसका देवप्रसाद तिमलसेना १५ हजार ८६५ ल्याएर दोश्रो भएका छन् ।

बारा — क्षेत्र नम्बर–१ मा रास्वपाका गणेश भिमल ३९ हजार ९९८ मत प्राप्त गर्दै निर्वाचित भएका छन् । उनका निकटतम प्रतिस्पर्धी नेपाली कांग्रेसका शम्भु बहादुर गुरुङले १४ हजार २२३ मत प्राप्त गरेका छन् ।

क्षेत्र नम्बर–२ मा रास्वपाका चन्दन कुमार सिंह ३५ हजार ५९० मतसहित विजयी भएका छन् भने जसपा नेपालका रामकिशोर प्रसाद यादव १४ हजार १९६ मतसहित दोश्रो स्थानमा छन् ।

क्षेत्र नम्बर ३ मा पनि रास्वपाका उम्मेदवार अरविन्द साह ४० हजार ६९६ मत ल्याई विजयी भएका छन भने निकटम प्रतिष्पर्धी कांग्रेसका दिग्गज नेता फरमुल्लाह मन्सूरले मात्र १० हजार ५२ मत ल्याएका छन् ।

क्षेत्र नम्बर–४ मा रास्वपाका रहबर अन्सारी ४१ हजार २०० मतसहित निर्वाचित भएका छन्। नेकपा एमालेका कृष्णकुमार श्रेष्ठ (किसान) ले ११ हजार ६३९ मत प्राप्त गर्दै दोस्रो स्थान हासिल गरेका छन् ।

पर्सा — क्षेत्र नम्बर–१ मा रास्वपाका बुद्धिप्रसाद पन्थ ‘हरि’ २७ हजार २७४ मतसहित विजयी भएका छन् भने एमालेका प्रदीप यादव १३ हजार ३० मतसहित दोस्रो स्थानमा छन् ।

क्षेत्र नम्बर–२ मा रास्वपाका सुशील कुमार साह कानु ३० हजार ७४० मत ल्याएर निर्वाचित भएका छन् भने यहाँ कांग्रेसका अजय कुमार चौधरी ११ हजार ८९० मतसहित दोस्रो स्थानमा रहेका छन् ।

क्षेत्र नम्बर–३ मा रास्वपाका रमाकान्त प्रसाद चौधरी २९ हजार ६७९ मत प्राप्त गर्दै विजयी भएका छन् भने कांग्रेसका सुरेन्द्र प्रसाद चौधरी १६ हजार ३६६ मतसहित दोस्रो स्थानमा छन् ।

क्षेत्र नम्बर–४ मा रास्वपाका टेकबहादुर साखे २८ हजार ६०० मतसहित निर्वाचित भएका छन् भने नेपाली कांग्रेसका रमेश रिजाल १२ हजार ५३४ मतसहित दोस्रो स्थान प्राप्त गरेका छन् ।