कुखुराको मासु खाँदा एकै परिवारका दुईको मृत्यु

• वैशाख ६, २०८३ | १५८ पटक पढिएको | सीमा संदेश

पोल्ट्री फार्ममा मरेको कुखुराको मासु खाँदा एकै परिवारका दुई जनाको मृत्यु भएको छ । 

कैलालीको चुरे गाउँपालिका–३ को भक्तपुर बस्ने ५ वर्षीय दिपक ताम्राकार र ८ वर्षीय भीम ताम्राकारको मृत्यु भएको प्रहरीले जनाएको छ । 

स्थानीय विकास पोल्ट्री फार्मबाट मरेको कुखुरा खरिद गरेको पाइएको प्रहरीले जनाएको छ । मासु खाएपछि बिरामी परेका परिवारका चार जनलाई उपचारका लागि अस्पताल लगिएको थियो । ती मध्ये दुई जनाको मृत्यु भएको हो । 

बोइलर कुखुराको मासु खाएका मृतककी आमा २८ वर्षीया राधिका ताम्राकार र उनका कान्छा छोरा ३ वर्षीय दिपेश ताम्राकारको सेती प्रादेशिक अस्पतालमै उपचार भइरहेको जिल्ला प्रहरी कार्यालय कैलालीका प्रहरी प्रमुख नरेन्द्र चन्दले जानकारी दिएका छन् । 

घटनापछि फार्म सञ्चालक मंगल साउदले आफैँ इलाका प्रहरी कार्यालय मालाखेतीमा उपस्थित भएर कागज गरेका छन् । उनलाई बोलाएका बखत हाजिर हुनेगरी आफन्तको जिम्मा लगाइएको प्रहरीले जनाएको छ ।