ठूलो नगदबोकेका नेपालीसहित दुईजना पक्राउ

• वैशाख १८, २०८३ | ५४ पटक पढिएको | सीमा संदेश

भारतीय सीमा सुरक्षा बल (एसएसबी) ले हुण्डी कारोबार नियन्त्रणका लागि सक्रियता बढाएको छ। बारा जिल्लाको कचोरवा नाका हुँदै नेपालबाट भारततर्फ ठूलो रकम लैजाँदै गरेका एक नेपालीसहित दुई जनालाई झडौखर चेकपोस्टमा नियन्त्रणमा लिइएको हो।

बिहीबार साँझ नियमित जाँचका क्रममा भारतीय नागरिक नरेश कुमार गुप्ता र नेपाली नागरिक जैलाल साह तेलीको साथमा रहेको ब्याग परीक्षण गर्दा उल्लेख्य परिमाणमा नगद फेला परेको एसएसबीले जनाएको छ।

एसएसबी मुख्यालय पिपराकोठीका सहायक कमान्डेन्ट बिश्वजित तिवारीका अनुसार गुप्ताको साथबाट नेपाली रुपैयाँ ९ लाख ६३ हजार ६५० तथा भारतीय रुपैयाँ ७१ हजार ४१० बरामद भएको थियो। त्यस्तै, तेलीको साथबाट नेपाली रुपैयाँ १ लाख १० हजार फेला परेको छ।

घटनापछि एसएसबी ७१औँ बटालियन अठमोहन कम्पनी तथा जितना प्रहरी चौकीको टोली घटनास्थलमा पुगेको थियो। एसएसबी प्रवक्ता बिनित कुमार सिंहका अनुसार बरामद रकमसहित दुवै जनालाई आवश्यक कानुनी प्रक्रिया अघि बढाउन जितना प्रहरीलाई जिम्मा लगाइएको छ। पक्राउ परेका भारतीय नागरिक बिहार पूर्विचम्पारण सिकारगन्जका नरेश कुमार गुप्ता र नेपाली नागरिक बारा कलैया उपमहानगरपालिका गालोपटी बजनिका जैलाल साह तेलीको रूपमा पहिचान खुलेको एसएसबिले जनाएको छ।