कृति सेननले किन गराइन ‘एग्स फ्रिज’ ?

• असार २५, २०८३ | १३५ पटक पढिएको | सीमा संदेश

बलिउड अभिनेत्री कृति सेननले आफ्नो फिल्म ‘मिमी’ को तयारीका क्रममा ‘एग्स फ्रिज’ गराएको खुलासा गरेकी छन्। एक अन्तर्वार्तामा उनले उक्त फिल्मका लागि तौल बढाउनुपर्ने भएकाले त्यही समयलाई एग्स फ्रिज गराउने उपयुक्त अवसरका रूपमा प्रयोग गरेको खुलाएकी छन्।

३५ वर्षीया कृतिका अनुसार एग्स फ्रिज गराउने निर्णयले भविष्यमा बायोलोजिकल क्लक वा सामाजिक दबाबका कारण विवाह वा सन्तान जन्माउने निर्णय गर्नुपर्ने अवस्थाबाट आफूलाई मुक्त राख्न मद्दत गर्छ। उनले विवाह वा अभिभावक बन्ने निर्णय व्यक्तिले मानसिक रूपमा पूर्ण रूपमा तयार भएपछि मात्र गर्नुपर्ने धारणा व्यक्त गरिन्।

धेरैलाई ‘एग्स फ्रिजिङ’ थाहा नहुन सक्छ तर यो प्रक्रिया एक चिकित्सकीय प्रक्रिया हो, जसमा महिलाको अण्डाणु निकालेर निषेचन नगरी भविष्यका लागि सुरक्षित रूपमा जमाएर राखिन्छ। आवश्यक परेमा पछि ती अण्डाणु प्रयोग गरेर गर्भधारणको प्रयास गर्न सकिन्छ। यो प्रविधि विशेषगरी केही समयसम्म मातृत्वलाई स्थगित गर्न चाहने महिलाका लागि उपयोगी मानिन्छ।

कृतिले यस प्रक्रियाले केही हार्मोनल तथा भावनात्मक प्रभाव पार्न सक्ने भए पनि भविष्यका लागि विकल्प सुरक्षित राख्ने दृष्टिले यो महिलाहरूका लागि उपयोगी निर्णय हुन सक्ने बताइन्।