त्रिशुला खोलामा अस्थायी पुल बनाएर सञ्चालनमा ल्याइयो सवारी

• साउन ५, २०८३ | १०१ पटक पढिएको | सीमा संदेश

सिरहा । बरियारपट्टी गाउँपालिका-५ स्थित त्रिशुला खोलामा अस्थायी पुल निर्माण गरी करिब एक सातादेखि अवरुद्ध रहेको सवारी आवागमन पुनः सञ्चालनमा ल्याइएको छ ।

अविरल वर्षाका कारण त्रिशुला खोलामा पानीको सतह बढेपछि सडक सम्पर्क विच्छेद भई स्थानीयवासीले दैनिक आवतजावत, बिरामी ओसारपसार तथा अत्यावश्यक सामग्री ढुवानीमा कठिनाइ भोग्दै आएका थिए ।

स्थानीयबाट गुनासो आएपछि इलाका प्रहरी कार्यालय महेशपुर पतारबाट प्रहरी निरीक्षक विशाल मल्लको नेतृत्वमा २० जना प्रहरीको टोली घटनास्थलमा खटिएको थियो।

प्रहरी टोलीले स्थानीय युवा, समाजसेवी तथा स्थानीयवासीसँग समन्वय गर्दै स्थानीय स्रोत-साधनको प्रयोगबाट अस्थायी पुल निर्माण गरेको हो। पुल निर्माण सम्पन्न भएसँगै लामो समयदेखि ठप्प रहेको सवारी आवागमन पुनः सुरु भएको छ।

अस्थायी पुल सञ्चालनमा आएपछि स्थानीयवासीलाई दैनिक आवतजावत, बिरामीको ओसारपसार तथा खाद्यान्नलगायत अत्यावश्यक सामग्री ढुवानीमा सहज भएको छ।