ट्रम्पको टिकटक र ह्वाइट हाउसका भिडियोबाट टेलर स्विफ्टका गीत हटाइए

• साउन २५, २०८३ | २३ पटक पढिएको | सीमा संदेश

वासिङ्टन। अमेरिकी राष्ट्रपति डोनाल्ड ट्रम्पको चुनावी अभियान र ह्वाइट हाउसले पोस्ट गरेका सामाजिक सञ्जालका भिडियोहरूबाट अमेरिकी पप गायिका टेलर स्विफ्टका केही गीतहरू हटाइएका छन्। अघिल्लो साता मात्र ट्रम्पको टोलीले स्विफ्टका दुईवटा चर्चित गीतहरू प्रयोग गरेको थियो।

यस विषयमा ह्वाइट हाउस र टेलर स्विफ्टका प्रतिनिधिले तत्काल कुनै प्रतिक्रिया दिएका छैनन्। स्विफ्टले हालै ट्रम्पबारे केही नबोले पनि सन् २०२४ मा ट्रम्पका डेमोक्र्याटिक प्रतिस्पर्धी तत्कालीन उपराष्ट्रपति कमला ह्यारिसलाई समर्थन गरेकी थिइन्। सन् २०२० को चुनावका क्रममा स्विफ्टले सामाजिक सञ्जालमा ‘हामी उनलाई आफ्नो राष्ट्रपतिका रूपमा चाहँदैनौँ भन्ने कुरा ट्रम्पलाई राम्ररी थाहा छ’ भनेर लेखेकी थिइन्।

ट्रम्पले भने पटक-पटक स्विफ्टको आलोचना गर्दै आएका छन्। स्विफ्टले ह्यारिसलाई समर्थन गरेपछि ट्रम्पले सामाजिक सञ्जालमा ‘म टेलर स्विफ्टलाई घृणा गर्छु’ भनी लेखेका थिए। गत वर्ष उनले ‘मैले त्यो भनेपछि स्विफ्टको चर्चा घटेको कसैले महसुस गर्‍यो?’ भन्दै टिप्पणी गरेका थिए। सब्रिना कार्पेन्टर र एरिआना ग्रान्डेसहित दर्जनौँ कलाकारहरूले ट्रम्प प्रशासनलाई आफ्ना गीतहरू प्रयोग नगर्न आग्रह गरिसकेका छन्।

ट्रम्पको चुनावी अभियानले गत साता आफ्नो टिकटक पेजमा स्विफ्टका गीतहरू प्रयोग गरेको थियो। स्विफ्टका चर्चित गीत र एल्बमको नाम जोडेर सीमा सुरक्षा र बाइडन-ह्यारिस प्रशासनप्रति व्यङ्ग्य गर्दै क्याप्सन राखिएको थियो।

जुन महिनामा पनि ट्रम्पको अभियानले स्विफ्टको नयाँ गीत ‘आई न्यु इट, आई न्यु यु’ प्रयोग गरी एक भिडियो पोस्ट गरेको थियो। ह्वाइट हाउसमा बालबालिकासँगको भेटघाट, यूएफसी म्याचमा नाचेको र र्‍यालीका दृश्यहरू राखिएको उक्त भिडियोमा ‘ट्रम्पभन्दा बढी देश र अमेरिकी जनतालाई कसैले माया गर्दैन’ भन्ने क्याप्सन दिइएको थियो।

पछिल्ला महिनाहरूमा ट्रम्प प्रशासन वा उनको अभियानले स्विफ्टका गीत प्रयोग गरेको यो तेस्रो पटक थियो। गत अप्रिलमा आर्टेमिस दोस्रोका अन्तरिक्ष यात्रीहरूसँग ट्रम्पको भेटघाटको भिडियोमा स्विफ्टको ‘हाई इन्फिडेलिटी’ गीत प्रयोग गरिएको थियो। त्यसैगरी नोभेम्बरमा स्विफ्टको ‘द लाइफ अफ अ शोगर्ल’ एल्बमको गीत राखिएको भिडियोमा अमेरिकी झण्डा, स्मारकहरू र ट्रम्पको गिरफ्तारीको तस्बिर प्रयोग गरिएको थियो।

उक्त पोस्टले सामाजिक सञ्जालमा ठुलो चर्चा पाएपछि ह्वाइट हाउसका प्रवक्ताले समाचार माध्यमहरूले यस्ता भिडियोलाई निकै प्राथमिकताका साथ फैलाउने भएकाले बनाइएको प्रतिक्रिया दिएका थिए। सामाजिक सञ्जालमा सक्रिय ट्रम्पको सञ्चार टोलीले अध्यागमन कारबाही, इरानविरुद्धका सैन्य कारबाही र भेनेजुएलाका पूर्वराष्ट्रपति निकोलस मादुरोको गिरफ्तारी जस्ता दृश्यहरू समेटेर विभिन्न गीतहरू पोस्ट गर्दै आएको छ।