सामुहिक बलात्कारको शिकार भएकी किशोरीले न्याय नपाएपछि गरिन् आत्महत्या

• भदौ ३१, २०७७ | ७५२ पटक पढिएको | सीमा संदेश

राजविराज । सप्तरीमा सामुहिक बलात्कारको शिकार भएकी किशोरीले न्याय नपाएपछि आत्महत्या गरेकी छन् ।

बलात्कारी विरुद्ध प्रहरीमा उजुरी नदिन गाउँलेले दबाब दिएपछि डाकनेश्वरी नगरपालिका– ७ ललितपुरकी १७ वर्षीया किशोरीले मङ्गलबार आत्महत्या गरेको परिवारजनले बताएका छन् ।

गत सोमबार बिहान धानखेतमा पानीको अवस्था हेर्न गएकी उनीमाथि चार जनाले बलात्कार गरेको मृत किशोरीले बताएकी थिइन ।

बलात्कार भएपछि किशोरीले उनीहरुविरुद्ध प्रहरी कार्यालय जान खोज्दा केही गाउँलेले पञ्चायती बसी किशोरीलाई उजुरी दिन रोकेका थिए । ओरोपीलाई कार्वाहीकालागि प्रहरी कार्यालयमा निवेदन दिन नदिँदा उनले आत्महत्या रोजेकी उनकी आमाले बताइन् ।

गाउँले पञ्चहरूको निर्णयबाट चित्त नबुझेपछि किशोरीले पीडा सहन नसकी आत्महत्या गरेकी जिल्ला प्रहरी कार्यालय सप्तरीका प्रहरी नायब उपरीक्षक एवम् प्रवक्ता तिलक भारतीले जनाएका छन् ।

मण्डल समुदायका ८÷१० जनाको छलफलले पीडित र उनकी आमालाई प्रहरी कार्यालय जान रोक लगाउँदै आरोपितहरूबाट रु ५५ हजार क्षतिपूर्ति भराउने निर्णय गरेको छिमेकीहरुले जानकारी दिए ।

साना घटनामा प्रहरी कार्यालय आउने तर संवेदनशील घटना लुकाउन खोज्ने प्रवृत्तिले प्रहरीलाई घटना अनुसन्धान गर्न र अपराधी पक्राउ गर्न समस्या हुने गरेको प्रहरीले जनाएको छ।

घटनाको खबर पाएलगत्तै प्रहरी निरीक्षक सँतोष खडकाको नेतृत्वमा जिल्ला प्रहरी कार्यालय सप्तरीको टोली, प्रहरी निरीक्षक धर्मराज मुडभरीको नेतृत्वमा इलाका प्रहरी कार्यालय कल्याणपुरको टोली, इलाका प्रहरी कार्यालय पातो र प्रहरी चौकी प्रवाहाको टोली घटनास्थल पुगेर अनुसन्धान गरेको छ ।

घटनास्थलमा पीडितले जोगिनका लागि धानबाली र आली समातेर गरेको सङ्घर्षका चिह्नहरु, मडारिएको धानका बाला, फुटेका हातका चुराहरु र अन्य प्रमाणहरु पाइएको प्रहरीले जनाएको छ ।

किशोरीको मृत्युपछि सामूहिक बलात्कारका चार आरोपित गाउँबाट फरार भएका छन् । घटनास्थल पुगेको प्रहरी टोलीले पीडितलाई प्रहरी कार्यालय जान रोक लगाउने र क्षतिपूर्ति भराउने निर्णय सुनाउने पञ्चहरू जयकान्त मण्डल, वासुदेव मण्डल र सत्यनारायण मण्डललाई भने पक्राउ गरेको छ ।

पक्राउ परेकालाई इलाका प्रहरी कार्यालय कल्याणपुरको नियन्त्रणमा राखिएको छ ।