विद्युत् प्राधिकरणका कर्मचारीहरूबीच कुटाकुट

• कार्तिक ३, २०८० | ४२० पटक पढिएको | सीमा संदेश

नेपाल विद्युत् प्राधिकरण वीरगञ्ज वितरण केन्द्रका कर्मचारीहरूबीच कुटाकुट भएको छ । केन्द्रका हेल्पर प्रेमदास तत्मा र स्टोर इन्चार्ज रामसुन्दर दासबीच कुटाकुट भएको छ ।

हेल्पर तत्माले निजी गाडीमा कार्यालयको भर्याङ लिएर जान खोज्दा जान नदिएपछि उनको गेट रोक्का गरिएको थियो । निजी कामको लागि सरकारी भर्याङ लिएर गइरहेकोले रोक्न खोज्दा सो विवाद भएको कर्मचारीहरूले बताएका छन् । स्टोर इन्चार्जलाई हेल्पर तत्माले चप्पल प्रहार गरेको कर्मचारीहरूको भनाइ छ । वितरण केन्द्रको परिसरमा उत्पन्न भएको विवाद साम्य गर्न केन्द्र प्रमुख अवधेशकुमार दुबेको कार्यकक्षमा दुबै पक्षलाई बोलाइ छलफल भइरहेको बेला सहायक इन्जिनियर चन्द्रिका सिंहले तत्माको कठालो समाएर घाँटी थिचेकोसमेत प्रत्यक्षदर्शीहरूले बताएका छन् ।

कर्मचारीहरूको कुटाकुटको विवाद र कार्यालय प्रमुखको कार्यकक्षमै पुनः कुटाकुट हुन थालेपछि करिब एक घण्टा कार्यालयको काम प्रभावित भएको थियो । अधिकांश सेवाग्राहीहरू अचानक कार्यालयमा के भइरहेको छ भन्ने बारेमा चकित परेका थिए । सरकारी कार्यालयमा अनुशासनहीन काम गर्ने कर्मचारीलाई कारबाही गर्नुपर्छ र जनताको काम सक्दो चाँडो गर्नुपर्नेमा कर्मचारीबीचको कुटाकुटको घटनाले वितरण केन्द्रको प्रतिष्ठामा आँच पुगेको सेवाग्राहीहरूको भनाइ छ ।

यस विषयमा केन्द्र प्रमुख दुबेले सामान्य विवादमा दुबैबीच झगडा भएको स्वीकारे । साथै उनले दुबै पक्षलाई बसाएर छलफलको माध्यमबाट मिलापत्रसमेत गराइसकेको जानकारी गराए । उनले हेल्पर तत्माको व्यवहार उदेकलाग्दो भएकोमा दुःख प्रकट गर्दै उनलाई विभागीय कारबाहीको लागि आपूmले प्रक्रिया अगाडि बढाउने बताए ।