महासचिव गुटेरेसको हस्ताक्षर किर्ते गरी ९० जनाबाट अढाई करोडभन्दा धेरै ठगी

• कार्तिक १५, २०८० | ५३५ पटक पढिएको | सीमा संदेश

संयुक्त राष्ट्रसंघका महासचिव एन्टोनियो गुटेरेसको हस्ताक्षर किर्ते गरी ९० जनालाई ठगी गर्ने सुरुचि भुजेल जेल चलान भएकी छिन् । जिल्ला अदालत काठमाडौंले सोमबार उनलाई पुर्पक्षका लागि थुनामा पठाएको हो । संयुक्त राष्ट्रसंघमार्फत टर्की पठाउने आश्वासन दिएर उनले पीडितहरूबाट अढाई करोडभन्दा धेरै रकम उठाएकी थिइन् । 

भुजेललाई प्रहरीको केन्द्रीय अनुसन्धान ब्युरो (सिआइबी)ले गत महिना पक्राउ गरेको थियो । आइतबार जिल्ला सरकारी वकिल कार्यालयमार्फत अदालतमा मुद्दा दायर भएकोमा अदालतले थुनामा पठाएको हो । 

भूकम्पले क्षतिग्रस्त टर्कीका सहरको पुनर्निर्माणका लागि राष्ट्रसंघमार्फत लैजाने भन्दै सुरुचिलगायतले झुक्याएर ठगी गरेका थिए । महासचिव गुटेरेसले नै हस्ताक्षर गरेको कामको अफर देखाएर उनीहरूले पैसा उठाएका थिए । ९० जना पीडितले दुई करोड ५९ लाख ७९ हजार पाँच सय रुपैयाँ ठगी गरिएको भन्दै सिआइबीमा जाहेरी दिएका थिए । सोही आधारमा अनुसन्धान गरी सरकारी वकिलमार्फत मुद्दा दायर गरिएको सिआइबीका प्रवक्ता एसपी नवराज अधिकारीले बताए । उनलाई सात वर्षसम्म कैद सजायको माग गरी मुद्दा दायर गरिएको थियो । 

प्रहरीले सुरुचिका श्रीमान् विनोद श्रेष्ठ तथा भाइ सुजन भुजेललाई पनि फरार प्रतिवादीका रूपमा मुद्दा दायर गरेको छ । ठगीका मुख्य योजनाकार विनोद भएको प्रहरीले जनाएको छ । 

पीडितहरूले दिएको जोहरीअनुसार युएन टर्कीको लेटरप्याटमा राष्ट्रसंघका महासचिव गुटेरेसले नै हस्ताक्षर गरेको अफरलेटर देखाइएको थियो । सोही पत्रका आधारमा विश्वासमा परेर उनीहरूले पैसा बुझाएका थिए ।  मासिक एक हजार चार सय डलर तलब हुने र पिआरकोसमेत सम्भावना हुने भन्दै पैसा असुलिएको थियो । एक व्यक्तिले चार लाख रुपैयाँसम्म बुझाएका थिए । 

पैसा बुझाएपछि इभिसासमेत दिएका थिए । तर, त्यो पनि नक्कली भएको खुलेको छ । पछि श्रेष्ठ फरार भएपछि पीडितहरू प्रहरीकोमा पुगेका थिए । धेरै कारोबार सुरुचीको बैंक खातामार्फत भएकाले प्रहरीले उनलाई पक्राउ गरी मुद्दा चलाएको हो । विनोद र सुरुचीले काठमाडौंको चुच्चेपाटीमा जमघट एन्ड बाइट्स रेस्टुरेन्ट चलाउँदै आएका थिए । पीडितहरूलाई त्यहीँ बोलाएर झुटो आश्वासन दिई उनले ठग्दै आएका थिए । सुरुचीले भने सबै लेनदेन श्रीमानले गरेकाले आफूलाई जानकारी नभएको बयान दिएकी थिइन् । 

इन्स्टाग्रामबाट चिनेका युवकद्वारा यौनशोषण र ठगी 

सामाजिक सञ्जाल इन्स्टाग्रामबाट चिनजान भएका युवालाई विश्वास गर्दा एक युवतीले लाखौँ गुमाएकी छिन् भने यौनशोषणमा समेत परेकी छिन् । शोषण गर्ने रामेछाप मन्थली घर भई बौद्ध बस्ने जेरी भन्ने नवीन तामाङ लामालाई प्रहरीले पक्राउ गरी मुद्दा दायर गरेकोमा अदालतले उनलाई थुनामा पठाएको छ । जिल्ला प्रहरी परिसर काठमाडौंले तामाङलाई पक्राउ गरी जबर्जस्ती करणी र ठगी मुद्दा चलाएको थियो । पीडितको जाहेरीअनुसार तामाङले कल मी मिस्टर तामाङ नामक  इन्स्टाग्राम अकाउन्टबाट युवतीलाई रिक्वेस्ट पठाई चिनजान भएको थियो । 

तामाङले आफू ३ कक्षादेखि अमेरिकामा अध्ययन गरेको र अमेरिका पठाइदिन सक्ने भन्दै नजिकिएका थिए । त्यही आश्वासनमा विभिन्न ठाउँमा राखेर यौनशोषण गरेको र १४ लाख रुपैयाँसम्म ठगी गरेको उजुरी दिएकी छिन् । पछि सम्पर्कविहीन भएपछि युवतीले प्रहरीमा उजुरी गरेकी हुन् । तामाङलाई मंगलबार काठमाडौं जिल्ला अदालतले थुनामा पठाएको छ ।