प्रमुख प्रशासकीय अधिकृत तानातानमा मेयर–उपमेयरबीच हानाहान

• मंसिर २७, २०८० | ३९७ पटक पढिएको | सीमा संदेश

जनताबाट चुनिएका जनप्रतिनिधिको छलफल र बोर्डको निर्णयबाट चल्ने मधेशका स्थानीय निकाय सरकारहरुमा गुण्डा र मसलको प्रयोग बढ्दै गएको छ । गैर कानुनी नियुक्ति, भ्रष्टाचार र कमिशनको खेलमा डुबेको मधेश प्रदेशको एकमात्र वीरगञ्ज महानगरपालिकामा मंगलबार दिउँसो हानाहान भएको छ ।

महानगर प्रमुख राजेशमान सिंह र उपप्रमसख इम्तियाज आलम पक्ष बीच कुटाकुट भएको छ । दुबै पक्षका मसलधारीको घम्साघम्सी बढ्दै गएपछि नायव प्रहरी उपरीक्षक कुमार थापाको नेतृत्वमा वीरगञ्ज महानगरपालिकामा बाक्लो प्रहरी परिचालन गरिएको थियो । प्रमुख प्रशासकीय अधिकृतको कार्यकक्ष नगर प्रमुखको कार्यकक्षसंगै सरे पछि विवाद भएको छ ।

अर्को भवनमा प्रमुख प्रशासकीय अधिकृत सरेपछि पुरानो कोठामा उपमेयरको सचिवालयमा ताल्चा लगाएपछि बिवाद चुलिएको छ । उक्त कोठामा मेयरले सामाजिक सुरक्षा तथा पञ्जीकरण शाखा सार्ने आदेश दिए पनि अर्कोपक्षले उपमेयरको सचिवालयको लागि कब्जा गरेपछि विवाद उत्कर्षमा पुगेको छ । विवाद ‘कार्यकक्ष’लाई लिएर भनिएपछि प्रमुख प्रशासकीय अधिकृतलाई आफूतिर ‘तान्ने र मान्ने’झगडाको मुख्य उद्देश्य भएको एक कर्मचारीले बताउँदै भने,–‘ उपमेयरको कार्यकक्षसंगै प्रशासकीय अधिकृतको कार्यकक्षबाट धेरै कुरा उनलाई थाहा हुने र सबैमा बराबरको हिस्सेदारीलाई न्यूनीकरण गर्न मेयर साहबले आफूतिर तान्ने भएपछि यो अडकेलो थपिएको हो, कार्यकक्षसंगै भएपछि मेयर र नव आगन्तुक प्रमुख प्रशासकीय अधिकृत बीच आफू पन्छिने हो कि ? उपमेयर पक्षको अनुमानलाई गलत कसरी भन्ने ? झगडाको चुरो कुरा पनि यहि हो ।’ महानगरप्रमुख सिंह बस्ने कार्यकक्ष भएको भवनमा माथि अर्को तल्ला थपेर, कार्यकक्ष माथि सारेपछि उनी बस्दै आएको कार्यकक्षमा प्रमुख प्रशासकीय अधिकृतको कार्यकक्ष सारिएको छ । प्रमुख प्रशासकीय अधिकृतको पुरानो कार्यकक्षमा वीरगञ्ज महानगरले पञ्जीकरण शाखा राख्ने तीनदिन देखि तयारी गर्दै आएको थियो ।

सामान सार्दै गरेको अवस्थामा उपप्रमुखको सचिवालयले त्यो कोठामा ताल्चा लगाएपछि विवाद सुरु भएको थियो । नगर प्रमुख सिंहको अनुरोधमा उपमेयरले लगाएको ताल्चा खोल्न केही वडाध्यक्षको टोली सहितले मंगलबार विहान प्रयास गरेपछि दोहोरो हानाहान भएको थियो । विवाद बढ्दै गएपछि मेयर र उपमेयरका समर्थक महानगरमा ओइरिएका थिए । सुरुमा अवस्था उग्र भए पनि प्रहरीका सहयोगमा सामान्य भएको प्रहरी नायव उपरीक्षक थापाले बताए । गत स्थानीय तहको निर्वाचनमा वीरगञ्ज महानगरपालिकामा सत्ताधारी कांग्रेस र जसपा गठबन्धनका मेयर र उपमेयरका उम्मेदवार विजयी भएका थिए ।

तर भागबण्डामा गैरकानुनी नियुक्ति, कमिशनमा मात्र कुनैपनि ठेक्कापट्टा दिने बढ्दै गएको परिपाटीले महानगरपालिकाको कतिपय फाइलहरु अख्तियार दुरुपयोग अनुसन्धान आयोग र सम्पत्ति शुद्धीकरण आयोगले लगेर छानबिन गरिरहेको छ । यता, वीरगञ्ज महानगरपालिकामा भएको कुटपिटमा उपमेयरका स्वकीय सचिव घाइते भएका छन् । प्रमुख प्रशासकीय अधिकृतको कोठालाई लिएर भएको झडपमा प्रहरीको लाठी चार्जले उपमेयर इम्तियाज आलमका स्वकीय सचिव शेषकुमार हजरा घाइते भएका छन् । उपमेयर आलमका स्वकीय सचिव हजराको आँखामा चोट लागेको जनाइएको छ । विवाद सल्टाउने क्रममा प्रहरीले गरेको लाठी चार्जबाट स्वकीय सचिव घाइते भएका थिए । स्वकीय सचिव हजराको अवस्था भने सामान्य रहेको उपमेयरको सचिवालयले जनाएको छ ।