राहत बाँड्ने नाममा नेता, सांसद र मन्त्रीले नै कोरोना सारेको आरोप : सांसद बिडारी

• वैशाख ३१, २०७७ | १९४ पटक पढिएको |

 सत्तारुढ दल नेपाल कम्युनिस्ट पार्टी (नेकपा) का सांसद रामनारायण बिडारीले मन्त्री, सांसद र नेताले कोरोना सारेको आरोप लगाउनुभएको छ । 

सांसद बिडारीले राहत बाँड्ने नाममा गाउँगाउँमा मान्छे जम्मा गरेर मन्त्री सांसद, नेता र सांसदहरुले कोरोना सङ्क्रमण फैलाएको आरोप लगाउनुभएको हो । 

राहतका कार्यक्रम पालिकाबाट व्यवस्थित रुपमा वितरण हुनुपर्ने भए पनि कसैले नपाएजस्तो गरी नेताहरु गएर कोरोना सङ्क्रमण फैलाएको आरोप उहाँले लगाउनुभयो । 

अहिलेको अवस्थामा उत्पादन भएका तरकारी, दूध र अण्डा सरकारले किनेर जनताको घरमा पुर्‍याउनुको सट्टा गफ गरेर नहुने उहाँले बताउनुभयो । त्यसका लागि कानुन निर्माण आवश्यक रहेको उहाँले बताउनुभयो ।

भारतले नेपाली भूमि अतिक्रण गरेको विषयमा सांसद बिडारीले नरेन्द्र मोदी सत्तामा आएदेखि नेपाललाई हैरान गरेको बताउनुभयो । संविधान निर्माणमा बाधा, नाकाबन्दी र सिमानामा मनलाग्दी काम गरेर नेपाललाई मोदी सरकारले हैरान पारेको उहाँले बताउनुभयो ।