जनकपुरमा व्यापारीलाई कुटपिट गर्ने प्रहरी माथि कारबाही

• जेठ २२, २०७७ | २९७ पटक पढिएको | सीमा संदेश

जनकपुरधाम । जनकपरधाममा व्यापारीहरुसँग दुर्व्यव्यहार गर्ने दुईजना प्रहरी कर्मचारी कारबाहीमा परेका छन् ।

लकडाउन पालन गराउन बजारमा पुगेका प्रहरीले बिहीबार जनकपुरधामको जानकी मन्दिर नजिक स्थानीय व्यापारी श्याम चौधरी र उनका बुवा झगरु चौधरीलाई कुटपिट गर्ने दुईजना प्रहरी प्रदेश कार्यालय जनकपुरमा तानिएको प्रदेश २ का डिआइजी धिरजप्रताप सिंहले जानकारी दिए ।

लकडाउन पालन गराउने क्रममा प्रहरीकै त्रुटि देखिएपछि जिल्ला प्रहरी कार्यालय धनुषामा कार्यरत प्रहरी सहायक निरीक्षक मेरुलाल गुप्ता र प्रहरी जवान दिपक यादवलाई २ नम्बर प्रदेश प्रहरीमा तानिएको प्रदेश प्रहरीका प्रमुख डिआईजी सिंहले बताए ।

‘आज जानकी मन्दिर नजिक स्थानिय व्यापारीसँग जुन व्यवहार भयो त्यसमा प्रहरीकै त्रुटि देखिएपछि दुई जनालाई कारवाहीको लागि प्रदेशमा तानिएको छ र प्रदेश प्रहरीका प्रवक्ता प्रहरी उपरीक्षक जयराज सापकोटाको नेतृत्वमा छानविन समिती गठन गरिएको छ’, उनले भने ।

यसअघि बुधबार मात्र सर्लाहीमा कार्यरत प्रहरीले तस्करलाई सघाएको प्रमाणित भएपछि एकजना असईसहित चारजना प्रहरी कर्मचारीलाई निलम्बन गरिएको थियो ।