प्रयोगशालाको गलत रिर्पोटको कारण प्रदेश २ का सांसद र कर्मचारीमा कोरोनाको त्रास

• जेठ २३, २०७७ | २४१ पटक पढिएको | सीमा संदेश

जनकपुरधाम । प्रदेश २ को प्रादेशिक जनस्वास्थ्य प्रयोगशालाले कोरोना भाइरस परिक्षणको गलत रिपोर्ट दिएपछि प्रदेश २ का सांसद तथा प्रदेशसभाका कर्मचारीमा सन्त्रास फैलिएको छ ।

रिपोर्ट नै नआइकन बुधवार प्रदेशसभाका सबै कर्मचारी तथा सांसदहरुको पिसिआर नेगेटिभ आएको जानकारी दिएको प्रयोगशालाले प्रदेशसभाको बैठक बसेको भोलिपल्ट ५ जनाको रिपोर्ट पोजेटि रहेको बताएपछि उनीहरुमा सन्त्रास फैलिएको हो ।

प्रदेशसभामै स्वाब दिएका बाहिरका एकजना प्रहरी बाहेक प्रयोगशालाले सबैको रिपोर्ट नेगेटिभ आएको जनाएपछि बुधवार प्रदेशसभाको बैठक डाकिएको प्रदेशसभाका निमित्त सचिव रंजित यादवले जानकारी दिए ।

प्रयोगशालाको गल्तीका कारण बुधवारको प्रदेशसभा बैठकमा सहभागी भएका सभामुख, मन्त्री, सांसद तथा कर्मचारीमा त्रास फैलिएको उनको भनाइ छ । प्रदेशसभा बैठक बस्नुअघि स्वाब संकलन गरिएको रिपोर्ट आएपछि बिहीवार दिउँसो प्रदेशसभाका ४ जना मर्यादापालक र एकजना आथिर्क मामिला तथा योजनाराज्यमन्त्रीकी स्वकिय सचिवमा संक्रमण पुष्टि छ ।

प्रदेशसभाको बुधबारको बैठकमा आर्थिक मामिला तथा योजनामन्त्री विजय यादवले आगामी वर्षको बजेटको प्रारुप प्रस्तुत गरेका थिए । त्यसैमा छलफलका लागि बिहीबार ३ बजे बैठक बोलाइएको थियो ।
प्रदेशसभा बैठकमा समेत सहभागी भएका उनीहरुमा संक्रमण पुष्टि भएपछि बिहीबार ३ बजेका लागि बोलाइएको प्रदेश सभाको बैठक स्थगित गरिएको थियो ।

शुक्रवार दिउँसो १ बजेसम्मकालागि प्रदेशसभा बैठक स्थगित गर्ने निर्णय पश्चात प्रदेश सभालाई स्यानिटाइज गरिएको छ ।

‘ल्याबले फोन गरेर सबैको रिपोर्ट नेगेटिभ रहेको भनेपछि बैठक बस्ने निर्णय भयो । उतिखेर केही व्यक्तिको मात्र रिपोर्ट आयो । ल्याबका कर्मचारीले हामी रिपोर्ट बनाउँदै छौँ । वान बाइ वान बनाउन अलि टाइम लाग्छ भनेपछि हामीले बैठक डाकेका थियौँ,’ प्रदेशसभाका निमित्त सचिव यादवले भने ।

उनका अनुसार बिहीवार दिउँसो डेढबजेमात्र ५ जनाको रिपोर्ट पोजेटिभ आएको प्रदेशसभा सचिवालमा जानकारी गराइएको थियो ।

तर बुधवार सबैको रिपोर्ट नआएको र रिपोर्ट आएकाहरुलाई मात्र बैठकमा सहभागी हुन सुझाव दिएको प्रादेशिक प्रयोगशालाका प्रमुख राम विनय साहले दावी गरे ।

‘हामीले रिपोर्ट आएका जतिको मात्र बुधवार नेगेटिभ रिपोर्ट आएको भनेर खबर गरेका थियौँ । आज आएको रिपोर्टमा पाँच जनामा संक्रमण पोजेटिभ पाइएको छ,’ उनले भने । संक्रमित मर्यादापालक र राज्यमन्त्रीकी स्वकिय सचिवलाई आइशोलेसन वार्डमा उपचारकालागि पठाइएको निमित्त सचिव यादवले बताए ।
संक्रमित मर्यादापालकको सम्पर्क तथा संसर्गमा पुगेकाहरुलाई छुट्टै कक्षमा बासको व्यवस्था गरिएको उनले बताए । उनका अनुसार पहिलो चरणमा शुक्रवार प्रदेशसभाका सबै सुरक्षाकर्मीको स्वाब संकलन गर्ने तयारी छ ।

‘सुरुमा सबै मर्यादापालकलाई जाँच गर्नुपर्छ तर शंका लागेमा अरुको पनि जाँच गर्न सकिन्छ,’ निमित्त सचिव यादवले थपे । संक्रमित सबैको स्वास्थ्य अवस्था समान्य रहेको बताइएको छ । यस्तै आर्थिक मामिला तथा योजना राज्यमन्त्री उषा यादवको स्वकीय सचिवमा समेत कोरोनासम्बन्धी कुनै लक्षण देखिएको छैन् ।