डाक्टरको लापरबाहीले महिलाको मृत्यु, लहानको लिला मदन पोलिक्लिनिकमा तनाव

• असार ५, २०७७ | ३०५ पटक पढिएको | सीमा संदेश

सिरहा । सिरहाको लहानमा शल्यक्रिया गर्न आएकी महिलाको मृत्यु भएपछि तनाव उत्पन्न भएको छ ।

लिला मदन पोलिक्लिनिकमा अपरेशन गराउन आएकी एक महिलाको डाक्टरको लापरवाहीले मृत्यु भएको भन्दै पिडित पक्ष आक्रोशित भएका छन् ।

सप्तरीको खड्ग नगरपालिका ३ बस्ने अन्दाजी वर्ष २३ की मौसम खातुनको मृत्यु भएको हो ।

खातुनको मृत्यु लगत्तै क्लिनिकका डाक्टर डा. दिलिप साह फरार भएका छन् ।

घटना लगतै पोलिक्लिनिकका सञ्चालक पीडित परिवारलाई मिलाउने प्रयास गरिरहेका छन् ।

अवस्था तनावग्रस्त भएपछि ईलाका प्रहरी कार्यालय लहानको टोली अस्पताल पुगेको थियो । अहिले घटनाको अनुसन्धान भइरहेको ईप्रका लाहानका डिएसपी सरत थापाले जानकारी दिएका छन् ।

२५ दिनअघि लिलामदनमै प्रसूतिको अपरेशन गरिएको थियो । उनका परिवारका अनुसार अपरेशनको दुई वटा टाँका चुडेपछि खातुनलाई पीडा भएको थियो । पेट दुखेपछि पुनः अस्पताल आउँदा ३० हजार रुपैयाँ लाग्ने र पुनः अपरेशन गर्नुपर्ने भन्दै अस्पतालले रकमको लोभमा अपरेशन गरेको परिवारजनको आरोप छ ।
दोस्रोपटक अपरेसनमा लापरबाही भएकोले खातुनको ज्यान गएको परिवारजनको भनाइ छ ।