भारी वर्षाले नदीहरुमा पानीको बहाब बढ्ने, उच्च सतर्कता अपनाउन आग्रह

• असार ११, २०७७ | ५३९ पटक पढिएको | सीमा संदेश

सिरहा । मनसुन सक्रिय भएकाले तराईँ मधेस सहित चुरे क्षेत्रमा भाी वर्ष हुने भएको छ । जल तथा मौसम विज्ञान विभागले केही स्थानमा भारी वर्षा हुने र नदीहरुमा बहाव बढ्ने भएकाले सतर्क रहन अनुरोध गरेको छ ।

विभागको बाढी पूर्वानुमान महाशाखाका अनुसार पानी पर्ने क्रम बढेसँगै देशका बिभिन्न स्थानका नदीहरुमा पनि बहाव बढ्ने छ ।

आजबाट कन्काई, कमला, बागमती, पश्चिम राप्ती, बबईलगायत सबै प्रदेशका तराई भई बहने साना नदीमा बहाव बढ्ने र जलसतह सामान्य अवस्थाबाट सतर्कता तह आसपास हुन सक्ने पूर्वानुमान गरिएको छ ।

त्यसैले नदी तटीय क्षेत्रमा उच्त सतर्कता अपनाउन बाढी पूर्वानुमान महाशाखाले अनुरोध गरेको छ ।

मौसम पूर्वानुमान महाशाखाका अनुसार हाल प्रदेश १, २, ५, कर्णाली प्रदेश र सुदूरपश्चिम प्रदेशका केही स्थानहरुमा वर्षा भइरहेको छ । आजै दिउँसो प्रदेश १, २, बागमती प्रदेश, ५ नम्बर प्रदेश, गण्डकी प्रदेश र कर्णाली प्रदेशका केही स्थानमा भारी वर्षाको सम्भावना छ ।

देशका धेरै स्थानहरुमा हल्कादेखि मध्यम वर्षा हुने भएकाले नदीमा पानीको बहाव बढ्ने, भूक्षय हुने, पहिरो जाने, सडक तथा हवाई यातायात प्रभावित हुने तथा ढल र पानीको राम्रो निकास नभएको ठाउँमा डुबान समेत हुन सक्ने भएकाले आवश्यक सतर्कता अपनाउन जल तथा मौसम विज्ञान विभागको मौसम पूर्वानुमान महाशाखाले अनुरोध गरेको छ ।