सिरहामा थप ३२ जनाले जिते कोरोना

• असार १४, २०७७ | ४९९ पटक पढिएको | बैधनाथ कुमार यादब

सिरहा । सिराहामा कोरोना भाइरस जितेर निको भई ३२ जना घर फर्किएका छन् । जिल्ला अस्पताल सिराहा र महेन्द्र गेनाई मेटरनिटी अस्पतालको आइसोलेसनमा उपचाररत ३२ जना डिस्चार्ज भएका हुन् । 

जिल्ला अस्पतालको आइसोलेसनमा सिराहा नगरपालिकाका सात, कल्याणपुर नगरपालिकाका पाँच, नरहा गाउँपालिकाका पाँच र झापाको बिर्तामोडका एकजना गरी १८ जनालाई शनिबार साँझ डिस्चार्ज गरिएको हो । 

त्यसैगरी महेन्द्र गेनाई मेटरनिटी अस्पतालबाट सिराहा नगरपालिका क्षेत्रका नौ, बरियारपट्टी गाउँपालिकाका एक, सुखिपुर नगरपालिकाका एक, गोलबजार नगरापलिकाका एक, विष्णुपुर गाउँपालिकाका एक र कर्जन्हा नगरपालिका एकजनालाई डिस्चार्ज गरिएको छ । 

दोस्रोपटकको पिसिआर जाँचको रिपोर्ट शनिबार निगेटिभ आएपछि उनीहरूलाई डिस्चार्ज गरिएको आइसोलेसन इन्चार्ज सरबिन्द मण्डलले बताए ।

कोरोना जितेर घर फर्किनेहरू सबै भारतको विभिन्न सहरबाट घर फर्किएकाहरू रहेको र उनीहरूलाई सूर्यनारायण सत्यनारायण मोरबैता यादव बहुमुखी क्याम्पस र नगरपालिकाहरूले स्थापना गरेको क्वारेनटाइनमा राखिएको थियो ।

जिल्ला अस्पतालको आइसोलेसनमा एकजना, चन्द्र माध्यमिक विद्यालयको आइसोलेसनमा ७६ जना र महेन्द्र गेनाई मेटरनिटी अस्पतालमा २८ जना गरी एक सय पाँचजना कोरोना संक्रमित अझै उपचाररत रहेका छन् ।

यसैसँगे सिरहामा कोरोना भाइरस जितेर घर फर्किनेको संख्या ८० पुगेका छन ।