सिरहा सदरमुकामा ओली र विद्याको पुतला दहन

• पुस १०, २०७७ | १,३१६ पटक पढिएको | बैधनाथ कुमार यादब

सिरहा । सिरहा सदरमुकाममा प्रधानमन्त्री केपी शर्मा ओली र राष्ट्रपति विद्या भण्डारीको पुतला दहन गरिएको छ । जनता समाजवादी पार्टी सिरहा नगरकमिटि उपाध्यक्ष बिनोद कामतीको नेतृत्वमा स्थानीय नेता तथा कार्यकर्ताले प्रधानमन्त्री र राष्ट्रपतिको पुतला जलाएको हो । 

प्रधानमन्त्रीको सिफारिसमा राष्ट्रपतिले असंवैधानिक रुपमा संसद विघटन गरेको भन्दै त्यसको विरोधमा पुतला जलाएको नगरकमिटि उपाध्यक्ष कामतीले बताए । उनीहरूले संसद पुनर्स्थापनाको मागसमेत गरेका छन् ।

जसपाका स्थानीय नेताहरूले प्रधानमन्त्री ओलीले मधेशलाई संधै होच्याए पनि वास्तविक देशद्रोही उनी नै रहेकोे बताए ।

ओलीले बाहिर ठूलठूला गफ दिएपनि देशको हितलाई नहेरी व्यक्तिगत स्वार्थमा लागेर देशलाई डुबाउन लागेको भन्दै उनलाई कडा करवाही गर्नु पर्ने नेताहरुका माग रहेको थियो ।