कमला नदीको पुलको अर्को स्पान पनि भासियो

• कार्तिक ३, २०७८ | ८३४ पटक पढिएको | बैधनाथ कुमार यादब

३ कात्तिक, सिरहा । हुलाकी सडकको मेरुदण्डको रुपमा रहेको सिराहा र धनुषा जोड्ने कमला नदीमा निर्माणाधीनकमला नदीको पुलको अर्को स्पान पनि भासिएको छ ।

दुई दिनको लगातारको बर्षाले कमला नदीमा आएको बाढीले केही महीनाअघि मात्रै निर्माण भएको पुलको धनुषातर्फबाट ३ नम्बरको स्पान पनि तल भासिएको हो ।  

पुलको पाया उत्तरतर्फबाट दुई फिटजति तल भासिएको छ। पाया भासिएपछि पुलबाट पैदल आवतजावत रोकेर प्रहरी खटाइएको छ। यसअघि गत असार १६ मा आएको बाढीले नदीको सिराहातर्फबाट दाेस्रो पाया भासिएको थियो। पाया भासिएसँगै पुलको स्ल्याब नदीमा खसेको छ। 

०६८ मा  पप्पु–लुम्बिनी जेभीले पौने २५ करोडमा ठेक्का लिई निर्माण थालेको पुलको काम सक्न अझै बाँकी रहेको छ । सात वर्षसम्म पप्पु कन्स्ट्रक्सनले सुस्त गतिमा काम गरेपछि हुलाकी राजमार्ग निर्देशनालय जनकपुरधामले हटाएर लुम्बिनी बिल्डर्सलाई जिम्मेवारी सुम्पेको थियो ।

गत तीन वर्षदेखि लुम्बिनी बिल्डर्सले कमला पुल निर्माण थालेको र ९५ प्रतिशत काम सम्पन्न भइसकेको थियो। पुलको फिनिसिङ गरी साउन पहिलो साता उद्घाटन गर्ने तयारी भइरहँदा असारमा आएको बाढीले पाया नै भासिएको थियो।

पुलको पाया भासिएपछि पछिल्लो चार महिनादेखि निर्माण कम्पनी र आयोजना कार्यालयले कुनै वास्ता नै राखेका थिएन्। आइतबारदेखिको अरिवल वर्षापछि कमला नदीमा पानीको बहाब बढेसँगै अर्को पाया पनि भासिएको हो।