सामुद्रिक आँधी ‘मिचाउङ’को प्रभाव, पूर्वी नेपालमा विमान उडान/अवतरण प्रभावित हुनसक्ने

• मंसिर १९, २०८० | ४२६ पटक पढिएको | सीमा संदेश

काठमाडौं । हाल नेपालमा पश्चिमी वायु र भारतको  उत्तर प्रदेशको आसपासमा रहेको न्यूनचापीय क्षेत्रको आंशिक प्रभाव  रहेको छ । देशको पूर्वी भू–भागमा बंगालको खाडीको मध्यपश्चिम क्षेत्र आसपास विकसित ‘मिचाउङ’ नामक शक्तिशाली सामुद्रिक आँधीको समेत आंशिक प्रभाव रहेको छ । जसका कारण मौसममा बदली आएको छ । 

‘मिचाउङ’को प्रभाव पूर्वी भागमा बढी रहेको मौसमविद् सञ्जिव अधिकारी बताउँछन् । “मिचाउङको असर पश्चिम र मध्य नेपालमा खासै पर्ने देखिँदैन,” उनले बाह्रखरीसँग भने, “तर पूर्वी नेपालमा भने यसले हावाको गती बढाइरहेको छ ।” 

हावाको गती बढाउँदा यसले पूर्वी नेपालका भद्रपुर र विराटनगर विमानस्थलबाट हुने उडान प्रभावित हुनसक्ने मौसमविद् अधिकारी बताउँछन् । तीव्र गतिमा हावा चल्ने भएकाले विमान उडान र अवतरणमा समस्या हुनसक्ने उनको भनाइ छ । 

“मिचाउङको प्रभाव र भोलि रहनेछ । त्यसपछि यसको प्रभाव कम हुँदै जानेछ,” उनले भने, “हावाको गति बढाए पनि यसले पानी भने पार्ने छैन ।”

जल तथा मौसम विज्ञान विभागका अनुसार आज बिहान कोसी र लुम्बिनी प्रदेशका साथै पहाडी भू–भागमा आंशिकदेखि सामान्य बदली रहेको छ । बाँकी भू–भागमा आंशिक बदलीदेखि मौसम सामान्यतया सफा रहेको छ । 

विभागले दिउँसो कोसी, मधेस, वाग्मती, गण्डकी र लुम्बिनी प्रदेशमा आंशिकदेखि सामान्य बदली रहने जनाएको छ ।  देशका बाँकी भू–भागमा आंशिक बदलीदेखि मौसम सामान्यतया सफा रहनेछ । 

कोसी, वाग्मती र गण्डकी प्रदेशको पहाडी भू–भागका एकदुई स्थानमा हल्का वर्षाको सम्भावना रहेको छ । देशका उच्च पहाडी तथा हिमाली भू–भागका केही स्थानमा हल्का हिमपातको सम्भावना रहेको छ ।

“वाग्मतीका केही स्थानमा वर्षाको सम्भावना रहे पनि काठमाडौं उपत्यकामा भने वर्षाको सम्भावना छैन,” मौसमविद् अधिकारीले भने । 

विभागका अनुसार राति कोसी, मधेस, वाग्मती र गण्डकी  प्रदेशमा आंशिक बदली रहनेछ । देशका बाँकी भू–भागमा आंशिक बदलीदेखि मौसम सामान्यतया सफा रहनेछ । 

कोसी र गण्डकी  प्रदेशका उच्च पहाडी तथा हिमाली भू–भागका एकदुई स्थानमा हल्का हिमपातको सम्भावना रहेको छ ।

वर्षा र हिमपातसँगै देशभरको तापक्रममा गिरावट आउन सक्ने भएकाले त्यसबाट हुनसक्ने असरबाट बच्न आवश्यक सतर्कता अपनाउन पनि विभागको आग्रह छ ।