धनुषा र सिरहा जोड्ने कमला नदीमा अर्को पक्की पुल बन्न सुरु हुँदै

• फागुन ११, २०८० | ५९१ पटक पढिएको | सीमा संदेश

धनुषा र सिरहा जोड्ने कमला नदीमा अर्को नयाँ पुल बन्ने भएको छ । धनुषाको सबैला नगरपालिका ४ पटेर्वाघाटदेखि सिरहाको कल्याणपुर नगरपालिका ५ चिकनाघाटसम्म पुल बन्ने भएको हो ।

५ सयमिटर भन्दा लामो पक्की पुलको अगामी शनिबार प्रधानमन्त्री पुष्पकमल दहाल प्रचण्डले शिलान्यास गर्ने कार्यक्रम छ । शनिबार पुलको शिलान्यास गर्न नेकपा माओवादी केन्द्रका अध्यक्ष समेत रहेका प्रधानमन्त्री प्रचण्ड आउन लागेको सबैला नगरपालिकाका मेयर कारीराम यादवले जानकारी दिए ।

संघीय सरकारको गौरबको योजना अन्तर्गत भौतिक पूर्वाधार तथा यातायात मन्त्रालयको सडक विभागबाट करिब एक अर्ब ११ करोड लागतमा पुल बन्न लागेको उनले बताए । पुल शिलान्यासको दिन पटेर्वा घाटमा सभालाई प्रचण्डले सम्बोधन गर्ने कार्यक्रम समेत रहेको जनाएको छ ।

सोही दिन उनले कमला नदीमा नवनिर्मित देशकै लामो झोलुंगे पुलको उदघाटन समेत गर्ने कार्यक्रम रहेको छ ।

१३ वर्ष अघि हुलाकी राजमार्ग अन्तर्गत कमला नदीमा बनिरहेको पुल संचालन नहुँदै भाँसिएपछि मर्मतको काम भइरहेको छ । तर, त्यो पुल कहिले संचालन हुने टुंगो नरहेको बेला कमला नदीमा अब बन्ने पुल चाँडै बने त्यसले हदसम्म राहत हुने त्यस क्षेत्रका नागरिकको आशा छ ।