उत्कृष्ट विद्यार्थीलाई साइकल वितरण : मधेश प्रदेशमा शैक्षिक सुधारको साझा प्रतिबद्धता

• भदौ ५, २०८२ | ६६५ पटक पढिएको | सीमा संदेश

मधेश प्रदेशका मुख्यमन्त्री सतीशकुमार सिंहले खस्किँदो शैक्षिक स्तर सुधार्न विद्यार्थी, शिक्षक, अभिभावक र सरोकारवालाको संयुक्त प्रयास अपरिहार्य रहेको बताएका छन्।

शिक्षा तथा संस्कृति मन्त्रालयको आयोजना र भारतीय महावाणिज्य दूतावास वीरगञ्जको समन्वयमा मंगलबार सम्पन्न कार्यक्रममा एसईई परीक्षा–२०८१ मा उत्कृष्ट नतिजा ल्याउने विद्यार्थीलाई साइकल वितरण गरिएको हो।

कार्यक्रमलाई सम्बोधन गर्दै मुख्यमन्त्री सिंहले प्रदेश सरकार शिक्षाको गुणस्तर सुधार गर्न योजनाबद्ध ढंगले अघि बढिरहेको बताए। “राष्ट्रलाई अघि बढाउने जिम्मेवारी भविष्यमा तपाईंहरूको काँधमा आउन सक्छ, त्यसैले शिक्षा प्रति समर्पित हुनुपर्छ,” उनले भने।

धनुषा, महोत्तरी, सर्लाही, सिरहा र सप्तरीका ८८ स्थानीय तहका उत्कृष्ट छात्र–छात्रालाई एक–एक वटा साइकल वितरण गरिएको थियो। नेपाल एसबिआई बैंक लिमिटेडको संस्थागत सामाजिक उत्तरदायित्व कार्यक्रम अन्तर्गत उपलब्ध १५० साइकल विद्यार्थीलाई हस्तान्तरण गरिएको हो।

महावाणिज्यदूत देवी सहाय मीनाले विद्यार्थीलाई बधाई दिँदै भने, “आज साइकल प्राप्त गर्ने हाम्रा होनहार विद्यार्थीहरू न केवल परिवारको गौरव, सम्पूर्ण प्रदेशकै शान हुनुहुन्छ।” उनले भारत सरकार नेपाल सरकारसँगै शिक्षा लगायतका प्राथमिक क्षेत्रमा निरन्तर सहयोग गर्ने प्रतिबद्धता समेत व्यक्त गरे।

कार्यक्रममा शिक्षा तथा संस्कृतिमन्त्री रानी शर्मा तिवारीले मधेशमा शैक्षिक स्तर सुधार गर्न आफ्नो मन्त्रालय प्रतिबद्ध रहेको उल्लेख गर्दै आवश्यक सबै प्रयास भइरहेको जनाइन्।

सो अवसरमा नीति तथा योजना आयोगका सदस्य डा. शीला मिश्रा, जिल्ला समन्वय समिति धनुषाका प्रमुख राजनन्द मण्डल, शिक्षा मन्त्रालयका निमित्त सचिव दिलीप ठाकुरलगायतको उपस्थिति थियो।