सर्वोच्चले दियो गगन थापाको नेतृत्वलाई मान्यता, देउवा र खड्काको रिट खारेज

• वैशाख ५, २०८३ | १५२ पटक पढिएको | सीमा संदेश

नेपाली कांग्रेसको आधिकारिता विवादमा सर्वोच्च अदालतले वर्तमान सभापति गगनकुमार थापाको पक्षमा फैसला गरेको छ । 

सर्वोच्चका न्यायाधीशद्वय शारंगा सुवेदी र नृपध्वज निरौलाको संयुक्त इजलासले थापा नेतृत्वको वर्तमान केन्द्रीय कार्यसमितिको पक्षमा निर्णय दिएको हो । तत्कालीन सभापति शेरबहादुर देउवा र कावा सभापति पूर्णबहादुर खड्काले थापा नेतृत्वको नेपाली कांग्रेसलाई वैधानिकता दिने निर्वाचन आयोगको निर्णय र विशेष महाधिवेशनको वैधानिकतामाथि प्रश्न उठाउँदै रिट दायर गरेका थिए । 

सर्वोच्चले देउवा र खड्काले दायर गरेको रिट खारेज गरिदिएको छ । संविधान, कानुन र नेपाली कांग्रेसका विधानविपरीत निर्वाचन आयोगले गगन थापा नेतृत्वको कांग्रेसलाई आधिकारिता दिएको दाबी रिटमा गरिएको थियो । 

उक्त रिटमा सुनुवाई सकिएपछि सर्वोच्चबाट निर्णय आएको हो । यो निर्णयपछि सभापति गगनलाई सभापतिको हैसियतमा काम गर्न थप सहज भएको छ । 

आफूलाई कांग्रेसको १४ औँ महाधिवेशनबाट निर्वाचित सभापतिकै हैसियतमा रहेको भन्दै देउवाले विशेष महाधिवेशनलाई नै अवैध भनेका थिए । 

सर्वोच्चले देउवा र खड्काको दाबी खारेज गर्दै थापा नेतृत्वमा रहेको नेपाली कांग्रेस र आधिकारिकता दिने गरी निर्वाचन आयोगबाट भएको निर्णयलाई वैधता दिएको छ ।