प्रदेश २ : एक महिनामा २१ हजार बढी सवारीसाधन कारबाहीमा, पौने २ करोड राजस्व असुली

• भदौ ४, २०७८ | ५७९ पटक पढिएको | सीमा संदेश

जनकपुरधाम, भदौ ४ गते । प्रदेश २ मा साउन महिनामा तीन सय ७६ मोटरसाइकल दुर्घटना भएका छन् ।  

प्रदेश २ को सिरहा, सप्तरी, धनुषा, महोत्तरी, सर्लाही, रौतहट, बारा र पर्सा गरी आठवटै जिल्लामा गत साउन महिनामा मात्र सवारी दुर्घटनामा परेर ३५ जनाले ज्यान गुमाएका छन् । दुर्घटनामा परेर एक सय ८१ जना गम्भीर घाइते र चार सय ५५ जना सामान्य घाइते भएको प्रदेश ट्राफिक प्रहरी कार्यालय पथलैया, बाराले जनाएको छ । 

प्रदेश ट्राफिक कार्यालय पथलैयाले साउन महिनामा २१ हजार तीन सय २९ वटा विभिन्न किसिमका सवारीसाधनलाई कारबाही गरेको छ । जसमध्ये ६ हजार एक सय ५१ वटा मोरसाइकल नियमविपरीत चलाएको आरोपमा कारबाहीमा परेका छन् ।

ट्राफिक प्रहरीले साउनमा सवारी साधन र चालकमाथि गरिएको कारबाहीबाट एक करोड ७६ लाख ४४ हजार राजश्व संकलन गरेको छ । एक महिनामा तीन सय ९१ वटा सवारी दुर्घटना भएका छन् । दुर्घटनामा पाँच सय ६२ सवारी साधन संलग्न छन् ।  

दुर्घटना न्यूनीकरणका गर्न विभिन्न जनचेतनामूलक कार्यक्रम गरिएको, राडार गनको प्रयोग गरी तीव्र गतिमा सवारी चलाउनेमाथि निगरानी बढाएको र ओभरलोड बोक्ने सवारी साधनहरुलाई यातायात कार्यालय पठाइएको, मापसे चेकिङलाई जारी राखेको र विभिन्न जिल्लामा आवश्यकताअनुसारको आकस्मिक चेकिङ गरिएको प्रदेश २ ट्राफिक प्रहरी कार्यालय पथलैयाले जनाएको छ ।