जनकपुर बजार बन्द गराउँदै हिड्ने १२१ जना पक्राउ

• असार ३१, २०७९ | ५५४ पटक पढिएको | सीमा संदेश

जनकपुरधाम । जनकपुरमा बजार बन्द गराउँदै हिंडेका एक सय २१ जना पक्राउ परेका छन् ।

तीन बुँदे मागसहित चुरे तथा वन जंगल संरक्षण अभियानी र सुकुम्बासीहरुलाई प्रहरीले पक्राउ गरेको हो ।

पूर्व घोषित अनुसार चुरे तथा वन जंगल संरक्षण अभियानीहरुले बिहीबार जनकपुरधाम बजार बन्द गराउन खोज्दा जनकपुरको मुरलीचोक चोक, कुआ बजार, शिव चोक र मिल्स एरियालगायतका ठाउँबाट उनीहरुलाई पक्राउ गरेको प्रहरीले जनाएको छ ।

पक्राउ परेकाहरुले सुकुम्बासीका नाममा अर्कै व्यक्तिले चुरे तथा वन, जंगलको अतिक्रमण गरिरहँदा पनि सरकारले ध्यान नदिएको, वर्षौदेखि बसोबास गर्दै आएका सुकुम्बासीलाई जग्गाधनी प्रमाण पत्र दिनुपर्ने माग गरेका छन् ।

पक्राउ पर्नेहरुमा एक सय १० जना महिला र ११ जना पुरुष रहेको जिल्ला प्रहरी कार्यालय धनुषाले जनाएको छ ।

जिल्ला प्रहरी कार्यालय धनुषाका प्रहरी प्रवक्ता दिपक रायले प्रक्रिया पुर्याएर पक्राउ परेकाहरुलाई छाडिदिने बताएका छन । गएको असार २५ गतेका दिन चुरे तथा वन जंगल संरक्षण अभियानीहरुले चुरे संरक्षण सहितका तीन बुँदे माग अघि सार्दै मधेश प्रदेशका राजधानी बन्द गर्नेसम्मका आन्दोलनको घोषणा गरेका थिए ।