प्रतिनिधिसभामा ३३ लाखसम्म खर्च गर्न पाइने, अरू कसले कति पाउँछन् ?

• असोज १६, २०७९ | ४१४ पटक पढिएको | सीमा संदेश

काठमाडौं । निर्वाचन आयोगले प्रतिनिधिसभा सदस्य र प्रदेश सभासदस्य निर्वाचनका लागि राजनीतिक दल तथा उमेदवारले गर्न पाउने खर्च सीमा निर्धारण गरेको छ । 

निर्वाचन क्षेत्रको मतदाता संख्या, मतदान केन्द्रको संख्या र क्षेत्रफललाई आधार बनाएर निर्वाचन खर्चको हद निर्धारण गरिएको आयोगका सचिव गोकर्णमणि दवाडीले जानकारी दिए ।

यसपटक निर्वाचन क्षेत्रअनुसार उमेदवारले खर्च सीमा फरक छ । आयोगले प्रतिनिधिसभामा ३३ लाख र प्रदेशसभामा २३ लाखसम्म खर्च गर्न पाउने गरी सीमा निर्धारण गरेको उनले बताए । 

०७४ को निर्वाचनमा प्रतिनिधिसभाका लागि २५ लाख र प्रदेशसभाका उमेदवारलाई १५ लाख खर्च सीमा निर्धारण गरिएको थियो । यसपटक उमेदवारले गर्न पाउने खर्चको सीमा बढाइएको हो । 

उनका अनुसार प्रतिनिधिसभामा २५ लाख, २७ लाख, २९ लाख, ३१ लाख, ३३ लाखसम्म खर्च गर्न पाइने गरी निर्वाचन क्षेत्रलाई ५ क्याटागोरीमा विभाजन गरिएको छ । 

त्यस्तै, प्रदेशसभातर्फका निर्वाचन क्षेत्रहरूलाई १५ लाख, १७ लाख, १९ लाख, २१ लाख, २३ लाखसम्म खर्च गर्न पाउने गरी विभाजन गरिएको छ ।