मान्छेहरु भन्थे, ‘हिरोइन बन्न सक्दिनौ’,

• कार्तिक १, २०८३ | ८ पटक पढिएको | सीमा संदेश

टेलिभिजनको दुनियाँदेखि बलिउडसम्म आफ्नो दमदार अभिनय र क्षमताका बलमा छुट्टै पहिचान बनाउन सफल अभिनेत्री मृणाल ठाकुरका लागि यो यात्रा सजिलो थिएन । करियरको सुरुवाती चरणमा उनले निराशाजनक र नकारात्मक अनुभवको सामना गर्नुपरेको थियो ।

उनको रूपरङ हेरेर ‘हिरोइन बन्न सक्दिनौ’ भन्ने गरिन्थ्यो । यस्ता टिप्पणी सुनेर मृणाल घर फर्किएपछि खुब रुन्थिन् । कतिपय बेला त उनले रेलको लिकमा हाम फालेर आत्महत्या गर्ने सोचसमेत बनाएकी थिइन् । त्यस्तो समयमा परिवारले उनलाई ठूलो साथ र हौसला दिएको थियो ।

अभिनेत्रीले कडा मेहनत र समर्पणका साथ आफ्नो संघर्षको सामना गरिन् । उनको मेहनतले फल दियो र आज उनी सफल अभिनेत्रीका रूपमा स्थापित छिन् ।

जन्म र पारिवारिक पृष्ठभूमि

मृणाल ठाकुरको जन्म सन् १९९२ अगस्ट १ मा महाराष्ट्रको धुलेमा भएको हो । उनका पिता उदय ठाकुर बैंकमा कार्यरत थिए । उनको जागिर सरुवा भइरहने प्रकृतिको थियो । पिताको सरुवाका कारण परिवार धुलेबाट मुम्बई सरेको थियो । उनकी आमा वन्दना ठाकुर गृहिणी हुन् । परिवारमा मृणालका एक दाइ धवल ठाकुर र एक दिदी लोचन ठाकुर छन् ।

उनकी दिदी मेकअप आर्टिस्टका रूपमा परिचित छिन् । उनका दाइ धवल ठाकुर इन्जिनियर हुन् । उनी अभिनयमा पनि सक्रिय छन् । विशेषगरी जियो हटस्टारको वेब सिरिज ‘ठुकरा के मेरा प्यार’ बाट उनले पहिचान बनाएका छन् ।

 मुम्बईसम्मको यात्रा

पिताको बैंकको जागिरका कारण परिवार मुम्बईमा स्थायी रूपमा बस्न थाल्यो । यही परिवर्तन मृणालको जीवनको महत्त्वपूर्ण मोड बन्यो । उनको पढाइ र करियरको दिशा पनि मुम्बईबाटै तय हुन थाल्यो ।

मृणालले मुम्बईमा विद्यालय तहको पढाइ पूरा गरिन् । त्यसपछि उनले मुम्बईको केसी कलेजमा आमसञ्चार विषयमा स्नातक अध्ययन सुरु गरिन् । तर, अभिनयमा व्यस्तता बढ्दै गएपछि उनले आफ्नो पढाइ पूरा गर्न सकिनन् । कलेज पढ्दादेखि नै उनी अडिसन दिन र टेलिभिजनको दुनियाँमा प्रवेश गर्न थालेकी थिइन् ।

मृणालका अनुसार ‘थ्री इडियट्स’ फिल्मले उनको करियर बदलिदियो । नत्र उनी अभिनेत्री नभएर कुनै क्लिनिकमा दन्त चिकित्सकका रूपमा काम गरिरहेकी हुन्थिन् ।

डाक्टर होइन, पत्रकार बन्ने सपना

मृणालका आमाबुबा उनलाई दन्त चिकित्सक बनाउन चाहन्थे । उनले प्रवेश परीक्षा पनि उत्तीर्ण गरेकी थिइन् । तर, उनको रुचि पत्रकारितातर्फ थियो । मुम्बईमा भएको आतंकवादी हमलाको समाचार रिपोर्टिङबाट प्रभावित भएर उनी अपराधसम्बन्धी समाचार लेख्ने पत्रकार बन्न चाहन्थिन् ।

पिताको अनुमतिपछि उनले पत्रकारिता विषयमा भर्ना लिइन् । तर, परिस्थितिले उनलाई पत्रकार होइन, क्यामेराअगाडि उभिने अभिनेत्री बनायो ।

रमाइलोका लागि दिएको अडिसनबाट पहिलो अवसर

कलेज पढ्ने क्रममा रमाइलोका लागि दिएको एउटा अडिसनले मृणालको जीवन बदलिदियो । सन् २०१२ मा उनले स्टार प्लसको टेलिभिजन सिरियल ‘मुझसे कुछ कहती… ये खामोशियाँ’ मा काम गर्ने अवसर पाइन् । यही उनको अभिनय यात्राको पहिलो ठूलो अवसर थियो ।

टेलिभिजनपछि उनले मराठी फिल्ममा काम गर्न थालिन् । उनको पहिलो मराठी फिल्म ‘हेलो नन्दन’ थियो । यस फिल्मबाट उनले ठूलो पर्दामा पाइला राखिन् र क्षेत्रीय सिनेमामा आफ्नो पहिचान बनाउन थालिन् ।

परिवारको चिन्ता र साथ

सुरुवाती दिनमा पढाइ प्रभावित हुन थालेपछि परिवारलाई उनको अभिनय करियरबारे चिन्ता थियो । पढाइ र काम एकैसाथ अघि बढाउन कठिन भएपछि पिताले उनलाई एउटा स्पष्ट दिशा रोज्न सल्लाह दिएका थिए । परिवारको साथले मृणाललाई आफ्नो निर्णयमा टिकिरहन शक्ति दियो ।

‘बुलबुल’ बनेर घरघरमा चिनिइन्

टेलिभिजन सिरियल ‘कुमकुम भाग्य’ मा बुलबुलको भूमिकाले मृणाललाई घरघरमा परिचित बनायो । यस भूमिकापछि दर्शकमाझ उनी ‘बुलबुल’ नामले लोकप्रिय भइन् । यसले उनको करियरलाई नयाँ उचाइमा पुर्‍यायो ।

बडी शेमिङ, अस्वीकृति र निराशाको समय

करियरको सुरुवाती चरणमा मृणालले आफ्नो रूप र शरीरलाई लिएर अनेकौँ व्यङ्ग्य सहनुपर्‍यो । उनलाई गाउँले केटीदेखि ‘मटका’ भन्नेसम्म गरिन्थ्यो । यस्ता टिप्पणीले उनी मानसिक रूपमा निकै प्रभावित भएकी थिइन् । संघर्षका क्रममा उनलाई लोकल रेलबाट हाम फालेर आत्महत्या गर्ने सोचसमेत आएको थियो ।

त्यतिबेला उनी अडिसन दिन टाढाटाढासम्म लोकल रेल र बस चढेर यात्रा गर्थिन् । इन्फिनिटी मलको शौचालयमा लुगा फेरेर अडिसन दिन जानु उनको दैनिकीको हिस्सा बनेको थियो ।

‘लभ सोनिया’ ले बदल्यो करियर

सन् २०१८ मा प्रदर्शनमा आएको इन्डो–अमेरिकी फिल्म ‘लभ सोनिया’ ले उनको करियरमा नयाँ मोड ल्यायो । मानव बेचबिखनको विषयमा आधारित यस फिल्ममा उनले सोनियाको भूमिका निर्वाह गरेकी थिइन् । उनको अभिनयको अन्तर्राष्ट्रिय स्तरमै प्रशंसा भयो ।

तर, फिल्मका लागि अडिसन दिँदा उनलाई टेलिभिजनमा धेरै देखिइसकेको भन्दै अस्वीकार गरिन्थ्यो । टेलिभिजनमा काम गरिसकेका कलाकारलाई फिल्ममा गम्भीरतापूर्वक नलिइने सोचले उनलाई पनि प्रभावित पारेको थियो ।

मृणालले एक अन्तर्वार्तामा बताएअनुसार फिल्मको छनोट प्रक्रियाका क्रममा उनको अडिसन भएको फाइलमा नखोल्नू भन्ने संकेत राखिएको थियो । निर्देशक तबरेज नुरानीले भने उक्त फाइल खोलेर अडिसन हेरे र उनलाई व्यक्तिगत रूपमा भेट्न बोलाए । भेटघाटपछि निर्देशकलाई मृणालले सोनियाको भूमिका निर्वाह गर्न सक्ने विश्वास भयो ।

भूमिकाअनुसारको रूप बनाउन पनि संघर्ष

‘लभ सोनिया’ मा सोनिया गाउँकी सरल युवती हुन् । यस भूमिकाका लागि आफ्नो रूपलाई चरित्रअनुसार बदल्न सकिने विश्वास मृणालले निर्माता डेभिड वोमार्क र फिल्मको टोलीलाई दिलाउनुपरेको थियो । मेकअप, केशसज्जा र प्राविधिक सहयोगबाट आफूलाई भूमिकाअनुसार प्रस्तुत गर्न सकिने भन्दै उनले अवसर दिन आग्रह गरेकी थिइन् ।

सुन्दरता मात्रै पर्याप्त हुँदैन

मृणालका अनुसार बाहिरी दुनियाँले सुन्दर र सफल व्यक्तिलाई सबै कुरा सजिलै प्राप्त भएको ठान्छ । तर, वास्तविकता त्यस्तो हुँदैन । हरेक व्यक्तिले जीवनमा संघर्ष गर्नुपर्छ । सफल हुन सुन्दरता मात्रै पर्याप्त हुँदैन, त्यसका लागि अन्य धेरै कुराको आवश्यकता पर्छ ।

उनले प्रसिद्धिको मूल्यबारे पनि आफ्नो धारणा राखेकी छन् । कहिलेकाहीँ आफू पनि सामान्य युवतीजस्तै जीवन बिताउन पाए हुन्थ्यो भन्ने लाग्ने गरेको उनले बताएकी छन् । प्रसिद्धिले सामान्य जीवनका साना खुसीसमेत त्याग्न बाध्य बनाउने उनको भनाइ छ ।

‘सुपर ३०’ बाट बलिउडमा ठूलो अवसर

‘लभ सोनिया’ मा मृणालको अभिनय देखेपछि धेरै फिल्मकर्मीले उनलाई नोटिस गर्न थाले । निर्देशक विकास बहल आफ्नो फिल्म ‘सुपर ३०’ का लागि सादगी र आत्मविश्वास दुवै झल्काउन सक्ने नयाँ अनुहारको खोजीमा थिए ।

मृणालले फिल्मका लागि अडिसन दिइन् । उनको अभिनय परीक्षण प्रभावशाली भएपछि ऋतिक रोशनको जोडीका रूपमा उनलाई छनोट गरियो । फिल्ममा उनले आनन्द कुमारकी प्रेमिका सुप्रियाको भूमिका निर्वाह गरेकी थिइन् । यस भूमिकाका लागि उनले तीन चरणमा अडिसन दिनुपरेको थियो ।

पहिलो चरणमा सामान्य दृश्यको अभिनय परीक्षण गरिएको थियो । दोस्रो चरणमा उनको भावनात्मक अभिनय क्षमता जाँचिएको थियो । तेस्रो चरणमा सुप्रियाको चरित्रअनुसार सादा बिहारी लुकमा स्क्रिन टेस्ट गरिएको थियो ।

‘बटला हाउस’ मा पनि अभिनयको अवसर

‘सुपर ३०’ पछि मृणाललाई बलिउडमा सम्भावना बोकेकी अभिनेत्रीका रूपमा हेरिन थालियो । त्यसपछि निर्देशक निखिल आडवाणीको फिल्म ‘बटला हाउस’ मा उनले जोन अब्राहमकी पत्नी नन्दिता कुमारको भूमिका पाइन् । फिल्ममा परिवार र कर्तव्यबीचको भावनात्मक द्वन्द्व देखाउने दृश्यमा उनको अभिनयको प्रशंसा भएको थियो । यस फिल्मका लागि पनि उनले अडिसन दिनुपरेको थियो ।

हिन्दी फिल्ममा उनको अभिनय देखेपछि दक्षिण भारतीय फिल्मकर्मीले पनि मृणाललाई नोटिस गर्न थाले । निर्देशक हनु राघवपुडी आफ्नो ऐतिहासिक प्रेमकथामा आधारित तेलुगु फिल्म ‘सीता रामम’ का लागि नयाँ अनुहार खोजिरहेका थिए ।

फिल्ममा मृणालले सीता महालक्ष्मी तथा नूरजहाँसँग सम्बन्धित भूमिका निर्वाह गरिन् । उनको अभिनय, पर्दामा देखिने उपस्थिति र चरित्रअनुसारको प्रस्तुतिले दर्शकको मन जित्यो । दुलकर सलमानसँग अभिनय गरेको यो फिल्म ठूलो सफल भयो । यसले मृणाललाई भारतभर परिचित बनाउनुका साथै रोमान्टिक अभिनेत्रीका रूपमा स्थापित गर्‍यो ।

दैनिक भास्करबाट