प्रदेश नं. २ मा कोरोना संक्रमित संख्या १ सय ३६ पुग्यो

• जेठ ७, २०७७ | १६८ पटक पढिएको |

नेपालमा हालसम्म प्रदेश ५ मा सबैभन्दा बढी १९६ जनालाई कोरोना भाइरस संक्रमण भएको छ । त्यसपछि प्रदेश २ मा १३६ जना संक्रमित भएको बुधबार स्वास्थ्य तथा जनसंख्या मन्त्रालयले जानकारी दिएको छ ।

प्रदेश १ मा ५९ जना, बागमतीमा २६ जना, सुदूरपश्चिममा ५ जना, गण्डकीमा ४ जना र कर्णालीमा १ जना संक्रमित भएको मन्त्रालयका प्रवक्ता डा. विकास देवकोटाले नियमित पत्रकार सम्मेलनमा जानकारी दिए ।

३८ जिल्लामा गरी अहिलेसम्म कुल संक्रमितको सख्ंया ४२७ पुगेको छ । जसमध्ये ४५ जना उपचारपछि घर फर्किएका छन् भने २ जनाको ज्यान गएको छ ।

प्रवक्ता देवकोटाले रुपन्देहीको क्रिसमन अस्पतालमा उपचाररत एक संक्रमितको मृत्यु नभएको पुष्टि गरेका छन् । ती संक्रमितको अवस्था गम्भीर रहेको देवकोटाले बताए ।

हालसम्म पीसीआर विधिबाट ३५ हजार ४ सय ९४ को परीक्षण भएको छ भने आरडीटी माध्यमबाट ७५ हजार ७२ वटा नमुना परीक्षण भएका छन् । त्यस्तै २३ हजार २ सय २ जना क्वारेन्टिनमा छन् ।