जटही नाकामा कार्यरत नेपाली सेनामा कोरोना पुष्टि

• जेठ २०, २०७७ | १८२ पटक पढिएको | सीमा संदेश

धनुषामा मंगलबार थपिएका चारजना कोरोना संक्रमितमध्ये एकजना नेपाली सेना रहेको पुष्टि भएको छ । योसँगै हालसम्म धनुषामा कोरोना संक्रमितको संख्या ८१ पुगेको छ ।

धनुषाका प्रमुख जिल्ला अधिकारी कोषहरि निरौलाका अनुसार संक्रमित सेना धनुषाको जटही नाकामा अभिलेख राख्ने काम गर्दै आएका थिए । मंगलबार कोरोना भाइरसको संक्रमण पुष्टि भएका नेपाली सेनासहित चारैजनालाई धनुषाको लक्ष्मीनिया गाउँपालिकास्थित बीपी मेमोरियल पोलिटेक्निकल ईन्टिच्यूटको आइसोलेसन कक्षमा पठाइएको सीडीओ निरौलाले बताए ।

नेपाली सेनाले निमार्ण गरेको बीपी मेमोरियल पोलिटेक्निकल ईन्टिच्यूटको आइसोलेसन कक्षमा हालसम्म ६ जना महिला र ५३ जना पुरुषगरी कुल ५९ जना कोरोना संक्रमितहरुको उपचार भइरहेको बताइएको छ ।

प्रदेश २ का सामाजिक विकास मन्त्रालयले नियमित रुपम आयोजना गर्दै आएको मिडिया बिफीगं मार्फत सप्तरीमा १ जना, सिरहामा १७ जना, धनुषामा ४ जना, महोत्तरीमा २ जना, सर्लाहीमा २१ जना, रौतहटमा ७४ जना र बारामा १ जना गरी प्रदेश २ मा आज १२० जनामा संक्रमण पुष्टि भएको मन्त्रालयका सचिव रामप्रसाद घिमिरेले जानकारी दिए ।

त्यसैगरी, धनुषाको धनौजी गाउँपालिकास्थित शंकर माध्यमिक विद्यालयको क्वारेन्टाइनका १ जना, नगराइन नगरपालिका गंगुलीस्थित प्रादेशिक क्वारेन्टाइनका १ जना र धनुषा जिल्लाकै हंसपुर नगरपालिकास्थित नवापुर माध्यमिक विद्यालय क्वारेन्टिनका २ जना पुरुषमा संक्रमणको पुष्टि भएको छ । उनीहरु तीनैजना भारतबाट फर्केर क्वारेन्टिनमा बसेका थिए ।