भारतमा नेपालीको कपाल मुण्डन गर्ने थप ३ जना पक्राउ

• साउन ३, २०७७ | ३०० पटक पढिएको | सीमा संदेश

सिरहा । प्रधानमन्त्री केपी शर्मा ओलीले दिएको भगवान रामको जन्मभूमीबारेको अभिव्यक्तिलाई लिएर भारतको वाराणसीमा एकजना नेपाली युवकको कपाल मुण्डन गरेर अभियोगमा प्रहरीले अहिलेसम्म चारजनालाई पक्राउ गरेको छ ।

कपाल मुण्डन गरेर त्यसमा ‘जय श्रीराम’ लेख्ने र नारा लगाएको अरोपमा भेलूपुर चौकीमा पाँचजना विरुद्ध उजुरी दर्ता भएको छ । वाराणसीका प्रहरी अधिकृत अमित पाठकले यो घटनामा प्रहरीले तत्काल कारवाही थालेको जानकारी दिए । भिडियो बनाउनेसहित चारजना पक्राउ परेको उनले बताए ।

अरुण पाठक नाम गरेको व्यक्तिले सो भिडियो सामाजिक सञ्जालमा पोस्ट गरेको जानकारी आएको र उनलाई पनि चाँडै पक्राउ गरिने उनको भनाइ छ ।

वाराणसीमा बस्ने एक नेपाली नागरिकको कपाल स्थानीय केही व्यक्तिले बुधबार जबरजस्ती मुण्डन गरेका हुन् ।