धनुषामा लुटेरा समूहद्वारा प्रहरीमाथि आक्रमण, पाँचजना पक्राउ

• माघ ५, २०७८ | ६४५ पटक पढिएको | सीमा संदेश

जनकपुरधाम, माघ ५ गते । धनुषामा लुटेरा समूहले प्रहरीमाथि आक्रमण गरेको छ ।

धनुषाको बटेश्वर गाउँपालिकास्थित प्रहरीचौकीका असई मनोज पोखरेलमाथि गएराति लुटेरा समूहले आक्रमण गरेको हो ।

टेश्वर गाउँपालिका वडा नम्बर ४ स्थित राम्रो चोकमा गएराति लुटेरालाई नियन्त्रण लिएपछि उनीमाथि आक्रमण भएको प्रहरीले जनाएको छ ।

आक्रमणबाट असई पोखरेल घाइते भएका छन् । उनको प्रादेशिक अस्पताल जनकपुरमा उपचार भइरहेको छ । उनको टाउकोमा १२ वटा टाका लागेको प्रहरीले जनाएको छ ।

महोत्तरीको भंगहा नगरपालिका वडा नम्बर ७ का अमित पासमान भारतको मद्रासबाट कमाएर फर्किदै गर्दा लुटेरा समूहले उनीसँग भएका पैसा, लत्ताकपडा, मोबाइल सहितका सामान लुटपाट गरेका थिए ।

 

लगतै पुगेको असई पोखरेल सहितको प्रहरी टोली घटनास्थलमा पुगेर लुटेरा समूहलाई पक्राउ गरेपछि उनीमाथि आक्रमण भएको हो ।

लुटपाट तथा प्रहरीमाथि आक्रमण गर्ने पाँचजनालाई पक्राउ गरेको धनुषाका प्रहरी उपरीक्षक रजौरेले बताए ।

जसमध्ये मुख्य आरोपी स्थानीय रामजिवन ठाकुरको साथबाट लागुऔषध नाइटरोभेट ट्याब्लेट र चक्कु बरामद भएको र घटना बारे थप अनुसन्धान भइरहेको जिल्ला प्रहरी कार्यालय धनुषाले जनाएको छ ।