मधेश प्रदेशका २३ स्थानीय तहले अझै ल्याउन सकेन बजेट

• कार्तिक ९, २०७९ | ४१६ पटक पढिएको | सीमा संदेश

जनकपुरधाम, कार्तिक ९ गते । मधेश प्रदेशका २३ स्थानीय तहले अझै बजेट ल्याउन सकेको छैन् । चालु आर्थिक वर्ष २०७९÷८० को तीन महिना सकिँदासम्म देशभरका २६ स्थानीय तहले बजेट ल्याएका छैनन् ।

संघीय मामिला तथा सामान्य प्रशासन मन्त्रालयका अनुसार ७५३ स्थानीय तहमध्ये बजेट नल्याउनेमा मधेश प्रदेशका २३ र लुम्बिनी प्रदेशका तीन स्थानीय तह रहेका छन् । अन्य सबै प्रदेशका स्थानीय तहले आफ्नो बजेट ल्याइसकेको छ ।

लुम्बिनी प्रदेशको रुपन्देही जिल्लामा पर्ने गैडहवा गाउँपालिका, दाङको राजपुर गाउँपालिका र बाँकेको डुडुवा गाउँपालिकाले बजेट ल्याउन सकेको छैन् ।

त्यसैगरी, मधेश प्रदेशमा सिराहाको मिर्चैया नगरपालिका, औरही गाउँपालिका र कर्जन्हा नगरपालिका, धनुषाका धनुषाधाम नगरपालिका, नगराइन नरपालिका, विदेह नगरपालिका, कमला नगरपालिका र धनौजी गाउँपालिकाले हालसम्म पनि बजेट ल्याएका छैनन् ।

त्यस्तै, महोत्तरीको सोनमा गाउँपालिका, सर्लाहीका मलंगवा नगरपालिका र विष्णु गाउँपालिका रहेका छन् । रौटहटका कटहरीया नगरपालिका, दुर्गाभगवती गाउँपालिका, फतुवा विजयपुर नगरपालिका, बौधीमाई नगरपालिका, माधवनारायण नगरपालिका, मौलापुर नगरपालिका र यमुनामाई गाउँपालिका रहेका छन् । बाराका महागढीमाई नगरपालिका र पचरौता नगरपालिकाले हालसम्म चालु आवको बजेट पेस गरेका छैनन् ।

पर्साको धोबीनी गाउँपालिका, सखुवा प्रसौनी गाउँपालिका र कालिकामाई गाउँपालिकाले बजेट ल्याउन सकेको छैन् ।

स्थानीय तहले असार १० गते नीति तथा कार्यक्रम नगर तथा पालिका सभामा पेस गरी असार मसान्तसम्म पारित गरिसक्नु पर्ने व्यवस्था छ ।