विवादित भारतीय बागेश्वर बाबालाई सरकारको विशिष्ट सुरक्षा र सम्मान, भोलि प्रधानमन्त्रीले भेट्ने

• भदौ १, २०८० | ५०५ पटक पढिएको | सीमा संदेश

काठमाडौं । जातीय छुवाछुतको सार्वजनिक अभ्यास गर्ने विवादित भारतीय धर्मगुरु बागेश्वर बाबा ‘धीरेन्द्रकृष्ण शास्त्री’ नेपाल आएका छन् । २५ जनाको दलबलसहित आएका बाबालाई सरकारले उच्चस्तरको सुरक्षा र सम्मान दिएको छ ।

पशुपतिनाथ मन्दिरमा बागेश्वरलाई हेर्न थाम्नै नसक्ने भीड लागेको थियो । तीज र शिवरात्रीमा जस्तै हजारौं मानिसहरु भेला भएका थिए । शास्त्री पशुपति मन्दिरभित्रको आरतीमा सहभागी भए । पशुपति विकास कोषले उनको स्वागतमा सवा करोड बत्ति बालेको थियो । त्यहाँबाट फर्केर होटल आएका शास्त्रीले आजको डिनर भने विनोद चौधरीको निजी निवासमा गर्दैछन् । शास्त्रीसहित सीमित व्यक्तिहरुलाई चौधरी निवासमा डाकिएको छ ।

‘अलिअलि ज्वरो आएको भनेर भेट्न नसक्ने सन्देश पठाउनुभएको छ’, स्रोतले भन्यो । यद्यपी, मिडियामा धेरै विवाद भएकाले राष्ट्रपतिले भेट्न नचाहेको हुन सक्ने स्रोतको अनुमान छ ।

सरकारले शास्त्रीलाई भारतको ‘वाइ सेक्युरिटी’ स्तरमा सुरक्षा प्रदान गरेको छ । प्रहरी प्रधान कार्यालयले नै सुरक्षा समन्वय गरिरहेको स्रोतले बतायो ।

‘एक जना हतियारधारी पीएसओ, स्कर्टिङमा एक मोटरसाइकल र सातजना प्रहरी उहाँको व्यक्तिगत सुरक्षामा खटाइएको छ’, स्रोतले भन्यो ।

शास्वत धाममा शास्त्रीले तीन दिन प्रवचन दिने कार्यक्रम रहेको छ । त्यहाँ दैनिक १५ हजारको उपस्थिति रहने अनुमान गरिएको इभेन्ट म्यानेजमेन्टको जिम्मा लिएका दिनेश डीसीले बनाए । डीसीका अनुसार आठ हजारवटा टिकट अनलाइनबाट बुक भइसकेको छ । बाँकी टिकट ‘अफलाइन’ बाट बाँडिने छ । टिकटका लागि शुल्क भने लाग्दैन ।

शास्वत धाममा तीन दिन प्रवचनपश्चात शास्त्री मेघौली जाने कार्यक्रम पनि तय भएको छ । आफ्नो टोलीका सबैलाई भारत फर्काएर उनी मेघौली जानेछन् । मेघौलीमा पीएसओ, बरुण चौधरी र दिनेश डिसीसँग उनले २४ घन्टा बिताउने बताइएको छ । शास्त्री ६ गते भारत फर्किने कार्यक्रम छ ।

भारतमा सार्वजनिक कार्यक्रममा नै दलितहरुलाई छुवाछुत गरेको विषयमा शास्त्री आलोचित रहँदै आएका छन् । उनले दलितलाई ‘अछुत’ भन्दै खुट्टा ढोग्न नदिएको भिडिओसमेत सार्वजनिक भएको छ । उनका केही अभिव्यक्तिहरु पनि विवादास्पद छन् ।

शास्त्रीलाई चौधरी ग्रुपले नेपाल ल्याएको हो । उनको टोलीलाई ल्याउने र राख्ने सबै खर्च चौधरी ग्रुपले व्यहोर्ने छ । स्रोतका अनुसार शास्त्रीले पारिश्रमिक भने लिएका छैनन् ।