'क्रिश्चन मन्त्री मुर्दाबाद' भन्दै हिन्दु सम्राट सेनाले जनकपुरमा गरे मन्त्री किराँतीको पुतला दहन

• पुस ७, २०८० | २९४ पटक पढिएको | सीमा संदेश

जनकपुरधाम । नेपाल सरकारको सँस्कृति मन्त्री सुदन किराँतीको राजीनामा माग गर्दै जनकपुरमा पुतला दहन गरिएको छ । 

शुक्रबार जनकपुरको रामानन्दचोकस्थित हिन्दु सम्राट सेनाले धर्मलाई लिएर दिएको अभिव्यक्तिप्रति आक्रोस प्रकट गर्दै राजीनामा माग गरेको हो । मन्त्री किराँतीले दुई दिन अगाडी एक सार्वजनिक कार्यक्रममा क्रिश्चन धर्म नमान्नेहरुलाई जेल कोच्ने जस्ता अभिव्यक्ति दिएपछि देशैभरि विरोध भएको हो । 

सोही क्रममा हिन्दु सम्राट सेनाका अध्यक्ष राजेश यादवको सक्रियता र राजु यादवको अगुवाईमा जनकपुरको रामानन्द चोकमा मन्त्री किराँतीको पुतलामा जुत्ता चप्पल प्रहार गर्दै पुतला दहन गरेको हो । “क्रिश्चन मन्त्री राजीनामा दे, क्रिश्चन मन्त्री मुर्दाबाद” को नारा लगाउँदै उनीहरु विरोध जनाएका हुन् ।