मधेश सरकारविरुद्ध सिटी जुलूस

• साउन २९, २०८१ | ३१४ पटक पढिएको | सीमा संदेश

मधेश सरकारले जम्बो मन्त्रिपरिषद् गठन गरेको भन्दै समाजवादी युवा सङ्घ र समाजवादी विद्यार्थी युनियनले विरोधमा जनकपुरधाममा सोमबार सिटी जुलूस निकालेको छ ।

जसपा नेपाल निकटको युवा सङ्गठन तथा विद्यार्थी सङ्गठनले संयुक्त रूपमा मधेश सरकारको जम्बो मन्त्रिपरिषद्लाई सानो आकारको बनाउन माग गर्दै नगरभित्र सिटी जुलूस निकालेर विरोध प्रदर्शन गरेको हो ।

आफूहरूले कुर्सी जुलुस निकालेर मधेश सरकारलाई जम्बो मन्त्रिपरिषद्लाई सानो आकारको बनाउनका लागि खबरदारी गरे पनि आफूहरूको माग नसुनेकाले सिटी जुलूस निकालेको समाजवादी युवा सङ्घ मधेशका कार्यवाहक अध्यक्ष कमलेश यादवले बताउनुभयो । मुख्यमन्त्रीलाई पदमा बसिरहने अधिकारसमेत नरहेको भन्दै उहाँले राजीनामा माग गर्नुभयो ।

जनकपुरधामको जनक चाेकबाट शुरू भएको विरोध र्‍याली मधेश भवनतर्फ अगाडि बढ्दा मिल्स एरियामा प्रहरीले अवरोध गर्न खोजे पनि युवा विद्यार्थीले प्रहरीको घेरा निष्तेज पार्दै मुख्यमन्त्री तथा मन्त्रिपरिषद् कार्यालय अगाडि पुगेर विरोध गरेका छन् ।