दलित बालिकालाई कुटपिट गर्ने दोषीलाई कारबाही गर्न माग

• भदौ ३०, २०८१ | ३६२ पटक पढिएको | सीमा संदेश

दलित बालिकाहरुमाथि भएको कुटपिट घटनामा संलग्न रहेका दोषीलाई तत्काल पक्राउ गर्न प्रदेशसभा सदस्य ललिता दासले माग गरेकी छन् ।

मधेश प्रदेशसभामा शनिबार सदनमा बोल्दै प्रदेशसभा सदस्य ललिता दासले सर्लाही भलुवाहीमा ८ जना दलित बालिकाहरुमाथि भएको कुटपिट घटनामा संलग्न रहेका दोषीहरुलाई तत्काल पक्राउ गर्नुपर्ने माग गरेकी छन् । सो बैठकमा बोल्दै सांसद दासले प्रदेश सरकारसँग दोषीलाई कानुनी दायरमा ल्याउनका लागि माग गरिन् ।

प्रदेशसभा सदस्य दासले भनिन्, ‘साँच्चिकै दलितको लागि न्याय मरेको हो त ? नत मिडयालाई मतलव छ नत प्रहरी प्रशासनलाई । कयौं बन्धन तोडेर विद्यालयसम्म पुगेका सर्लाही भलुवाहीका ८ जना दलित बालिकाहरुलाई घर फर्किने बेलामा विनोद डाक्टर र रामइश्वरको छोराहरुले हाम्रो भाइबहिनीहरुसँग बराबरी मुख लाग्छस् भनेर मरनासन्न हुनेगरि कुटपिट गरे ।

अहिले ति बालिकाहरु अस्पतालमा उपचाररत छन् । यो विषयलाई त्यहाँका जनप्रतिनिधिहरुले ढाकछोप गरि लुकाउन खोज्दै छन् । के यस्तै भइराख्यो भने दलित बालबालिकाहरु ढुक्क भएर आफ्नो मनको कुराहरु बोल्न सक्छन् त ? फेरि ढुक्क भएर विद्यालय जान सक्छन् ? यसमाथि कडाभन्दा कडा कारवाहीको माग गर्दछु ।’

प्रदेशसभा सदस्य दासले यसअघि पनि संसदमा वन कार्यालय लहानका अधिकृत सुजितकुमार झाको सरुवामा मुख्यमन्त्री सतीशकुमार सिंहले घुस लिएको आरोप लगाएकी थिइन् ।