नेपाली विद्यार्थीको सुरक्षार्थ सम्पूर्ण कदम चाल्न तयार छौँ : प्रवक्ता जयसवाल

• फागुन ९, २०८१ | ५७७ पटक पढिएको | सीमा संदेश

भारतले ओडिसास्थित कलिंगा इन्स्टिच्युट अफ इन्डस्ट्रियल टेक्नोलोजी (केआईआईटी) विश्वविद्यालयको होस्टेलमा भएको नेपाली विद्यार्थी प्रकृति लम्सालको मृत्युप्रति दु्ःख व्यक्त गरेको छ ।

भारतीय विदेश मन्त्रालयका प्रवक्ता रणधीर जयसवालले पत्रकार सम्मेलनमा भुवनेश्वरको केआईआइटी विश्वविद्यालमा भएको नेपाली छात्राको दुःखद निधनप्रति गहिरो दुःख व्यक्त गरेका हुन् ।

“भारतमा रहेका सबै नेपाली विद्यार्थीको सुरक्षा र हितको लागि आवश्यक सम्पूर्ण कदम चाल्न भारत सरकार तयार छ,” उनले भने ।
भारत सरकारले सबै अन्तर्राष्ट्रिय विद्यार्थीको सुरक्षा र हितलाई उच्च प्राथमिकता दिने उनले जनाए ।

“आरोपितलाई पक्राउ गरिएको छ । अनुसन्धान अघि बढेको छ । छानविनको लागि ओडिसा सरकारले उच्चस्तरीय समिति गठन गरेको छ । नेपाल विद्यार्थीलाई फर्कन अनुरोध गरिसकिएको छ,” विदेश मन्त्रालयका प्रवक्ता जयसवालले भने ।

यही फेब्रुअरी १६ का दिन केआईआईटी विश्वविद्यालयको गल्स होस्टेलमा नेपाली छात्रा प्रकृति लम्साल मृत अवस्थामा भेटिएकी थिइन् । उनले आत्महत्या गरेको प्रारम्भिक अनुसन्धानले देखाएको छ ।

नेपाली छात्रा मृत अवस्थामा भेटिएपछि त्यहाँ अध्ययनरत अन्य नेपाली विद्यार्थीले निष्पक्ष र स्वतन्त्र छानबिनको माग गर्दै आन्दोलन गरेका थिए । त्यसपछि केआईआईटी प्रशासनले नेपाली विद्यार्थीलाई तत्काल होस्टल खाली गर्न र स्वदेश फर्कन भनेको थियो ।

फेब्रुअरी १७ का दिन केआईआईटी प्रशासनले त्यहाँ अध्ययनरत ५ सयभन्दा बढी नेपाली विद्यार्थीलाई जर्बजस्ती बसमा चढाई रेल स्टेसमा लगि छोडिदिएको थियो । त्यसपछि लम्साको मृत्यु र केआईकेआईटी प्रशासनले गरेको अमानवीय कार्यको नेपाल र भारत दुवै देशमा व्यापक विरोध भएको थियो ।

दबाब थेग्न नसकेपछि फेब्रुअरी १७ का दिन नै केआईआइटी प्रशासनले माफी माग्दै नेपाली विद्यार्थीलाई फर्कन आह्वान गरेको थियो ।