गुडिरहेको बसबाट खसेर सहचालकको मृत्यु

• असोज २४, २०८२ | ५५४ पटक पढिएको | सीमा संदेश

पूर्वपश्चिम लोकमार्गअन्तर्गत सिरहाको धनगढीमाई नगरपालिका– ९ जिरोमाइलनजिकै बिहीबार बिहान गुडिरहेको बसबाट खसेर सहचालकको मृत्यु भएको छ।

विराटनगरबाट मधेशको प्रादेशिक राजधानी जनकपुरधामतर्फ जाँदै गरेको ना.७ख २६५ नम्बरको यात्रुवाहक बसबाट बिहान करिब ११ बजेतिर खसेर गम्भीर घाइते भएका लहान नगरपालिका– १ घर भएका करिब २१ वर्षीय पवनकुमार यादवको मृत्यु भएको हो।

जिल्ला प्रहरी कार्यालयका सूचना अधिकारी तथा प्रहरी नायब उपरीक्षक रमेश पालका अनुसार बसको पछाडिको चक्काले किचेर गम्भीर घाइते भएका उनलाई तत्काल उद्धार गरी उपचारका लागि लहानस्थित रामकुमार शारडा उमाप्रसाद मुरारका प्रादेशिक अस्पताल पुर्‍याइएपछि मध्याह्न १२ बजेतिर चिकित्सकले उनलाई मृत घोषणा गरेका हुन्।

बसबाट सहचालक खसेको जानकारी पाएलगत्तै धनगढीस्थित इलाका प्रहरी कार्यालयका प्रमुख प्रहरी नायवब निरीक्षक दिलीपकुमार सिंहको नेतृत्वमा प्रहरी टोली घटनास्थल पुगेर घाइतेको उद्धार गरी उपचारका लागि लहान पठाएको थियो। घटनापछि बसका चालक ४० वर्षीय लक्ष्मी महतोलाई नियन्त्रणमा लिई थप अनुसन्धान गरिरहेको र बस धनगढी प्रहरीमा राखिएको प्रहरीले जनाएको छ।